Fasiləli oruc pəhrizi həm çəki azaltmasına, həm də sağlamlığa faydasına görə məşhurların və CEO-ların rəğbətini qazanıb.

Orucun orqanizmi bərpa etməsi və hətta ömrü uzatmasıyla bağlı ümidverici sübutlar olsa da, bu, arıqlamaq üçün ən yaxşı üsul olmaya bilər. Dietoloqlar da yeməyi azaltmazdan əvvəl diqqətli olmağı tövsiyə edirlər.

Fasiləli oruc günün son yeməyilə növbəti günün ilk yeməyi arasında uzun bir fasilə verməklə, gün ərzində daha tez-tez yeməyi nəzərdə tutan vaxt məhdudiyyətli pəhriz növüdür. Bu pəhriz zamanı günün 8 saatı ərzində yeyib sonrakı 16 saatda fasilə vermək lazımdır.

Fasiləli oruc vaxt məhdudiyyətli pəhrizin yeganə növü deyil. Digər pəhrizlər, məsələn, 5:2 pəhrizi (5 gün normal miqdarda və 2 gün bunun dörddə biri qədər kalori qəbul etmək) yeməklər arasındakı fasilədən daha çox yeməyin miqdarına fokuslanıb.

"Arıqlamaq üçün zaman məhdudiyyətli qidalanma üsulundan istifadə olunur, ancaq bu, mənim ən bəyəndiyim üsul deyil. Bu pəhrizdə siz kaloriləri azaldırsınız, ancaq qidalanmayla bağlı əsas davranış dəyişikliyini öyrənə bilmirsiz" - Londonda yerləşən "DNA Dietitian" firmasının qurucusu Rachel Clarkson belə deyir.

Clarkson qeyd edir ki, insanlar sağlam pəhrizin nə demək olduğunu öyrənməsələr, pəhrizi dayandırdıqdan sonra yenidən kökələcəklər:

"Özünüzü ac və çərçivədə hiss edəndə ertəsi gün daha çox yemək yeyə bilərsiniz".

Ona görə də arıqlamaq istəyənlər üçün fasiləli oruc doğru seçim olmaya bilər. Ancaq yemək vərdişini başqa səbəblərdən də dəyişmək lazım gələ bilər.

Oruc sağlamlığa potensial faydaları baxımından çox maraq doğuran autofagiya prosesini işə salır.
BBC