Sentyabrda təqdimatı gözlənilən "iPhone 17" seriyası ilə bağlı yeni məlumatlar, qiymətlərin artacağını və xüsusən Pro modellərdə yaddaş tutumunun dəyişəcəyini göstərir.

İddialara görə, bu artımın səbəbi istehsal xərclərinin yüksəlməsi və xüsusilə Çindəki gömrük rüsumlarıdır.

Sənaye mənbələrinin məlumatına əsasən, bütün "iPhone 17" modellərinin satış qiymətinə təxminən 50 ABŞ dolları əlavə olunacaq. Bu halda ABŞ bazarında "iPhone 17"nin başlanğıc qiymətinin 849 dollar, "iPhone 17 Air"in isə 949 dollar civarında olacağı gözlənilir.

Pro modellərdə isə mövcud 128 GB baza yaddaş seçimi 256 GB-a qaldırıla bilər. ABŞ qiymətlərinin "iPhone 17 Pro" üçün 1.049 dollar, "Pro Max" üçün isə 1.249 dollar olması ehtimal edilir.

Yeni seriyanın "iPhone 17", "iPhone 17 Air", "iPhone 17 Pro" və "iPhone 17 Pro Max" modellərindən ibarət olacağı bildirilir. Əsas modelin dizaynı ötən ilin "iPhone 16" modelinə bənzəsə də, Air versiyası 5,5 mm qalınlığı ilə indiyədək istehsal olunmuş ən nazik "iPhone" ola bilər. Pro seriyasında isə yenilənmiş dizaynla yanaşı, gücləndirilmiş prosessor, təkmilləşdirilmiş kamera sistemləri və süni intellekt xüsusiyyətləri ön plana çıxacaq.

Bütün bu məlumatlar hələlik qeyri-rəsmi sızıntılar olsa da, 9 sentyabr 2025-də keçiriləcək rəsmi təqdimatda hansı iddiaların təsdiqlənəcəyi maraqla gözlənilir.