Tanınmış teleaparıcı Elçin Əlibəyli ölkə başçısından Azərbaycan Televiziya və Radio Akademiyası yaradılmasını xahiş edib.
Metbuat.az xəbər verir ki, o, bu gün öz Facebook hesabında bu barədə yazıb.
Qeyd edək ki, Azərbaycanda ilk televiziya verilişi 1956-cı il fevralın 14-də efirə çıxıb. Azərbaycan müstəqillik əldə etdikdən sonra müstəqil teleradio şirkətləri yaranıb. Azərbaycan televiziyası radiodan 30 il sonra fəaliyyətə başlayıb. Bakıda televiziya mərkəzi üçün binanın inşasına 1954-cü ildə start verilib. Tikinti yeri kimi Bakının ən hündür məkanlarından biri – Mehdi Hüseyn 1 adlanacaq ünvan seçilib. Telemərkəzin binası 1955-ci ilin sonunda təhvil verilib. 1956-cı ilin fevralına qədər Bakı studiyasının ara-sıra sınaq verilişləri yayımlanıb. İlk dəfə efirə gənc aktrisa Nəcibə Məlikova çıxıb. Çıxışını «Göstərir Bakı!» ifadəsi ilə başlayan Nəcibə xanım tamaşaçıları televiziyanın fəaliyyətə başlaması münasibəti ilə təbrik edib. Həmin gün "Bəxtiyar" bədii filmi də göstərilib.
Hazırda ölkədə paytaxt və regionlar daxil ümumilikdə 27 telekanal çalışır.