Mərkəzi qərargahı İsveçdə yerləşən Stokholm Beynəlxalq Sülh Araşdırmaları İnstitutu (SIPRI) dünyanın 100 ən böyük silah şirkətini açıqlayıb. Ordu.az xəbər verir ki, siyahıda Türkiyənin müdafiə sənayesi sektorunun ən böyük şirkəti olan ASELSAN da var.

ASELSAN SİPRİ-nin siyahısında 51-ci yerdədir. Şirkət 2020-ci ildə 2,2 milyard dollar silah satışı həyata keçirib. Bu 2019-cu illə müqayisədə 12% çoxdur.

Ankarada yerləşən şirkətin əsas fəaliyyət sahəsi hava, quru və dəniz qüvvələri üçün müasir hərbi məhsulların tədqiqatı, inkişafı və istehsalıdır. Şirkət Türkiyə Silahlı Qüvvələrinin əsas podratçılarından biridir. ASELSAN “Defence News” jurnalı tərəfindən gəlir baxımından 48-ci ən böyük müdafiə şirkəti olaraq müəyyən edilib. Türkiyə Ordusu Fondu şirkətin qurucusu və əsas səhmdarıdır.