Noyabrda Türkiyədə əcnəbilərə ev satışı 48.4% artıb. Lirənin ucuzlaşması evlərin qiymətini əlində möhkəm valyuta olanlar üçün xeyli ucuzlaşdırıb. Ümumilikdə noyabrda əmlak bazarında canlanma qeydə alınıb, ümumi satış bir il öncəylə müqayisədə 59% artıb, 179 minə yaxın ev satılıb. Rəqəmləri Türkiyə Statistika İnstitutu açıqlayıb.

Əcnəbilərə isə 7 min 363 əmlak satılıb ki, bu da müvafiq data yığılan 2013-cü ildən ən yüksək aylıq göstəricidir. Əcnəbi alıcılar içində birinci yeri iranlılar tutur. Sonra iraqlılar və rusiyalılar gəlir.

İlin ilk 11 ay ərzində əcnəbilərə əmlak satışı 39.4% artıb. Ümumi ev satışı isə 9.2 faiz azalıb.

Əcnəbilər ən çox İstanbulda ev alırlar, əcnəbilərə 3 minə yaxın ev məhz bu şəhərdə satılıb. Sonrakı yerləri Antalya kurort şəhəri və paytaxt Ankara tutur.

Noyabrda ipoteka satışı 61% artıb, 39 mindən çox əmlak ipotekaya verilib. Ötən il satış pandemiya dövründə dövlət banklarının ucuz kreditləri hesabına yüksəlib. Daşınmaz əmlak developerləri alıcılar üçün kampaniyalar keçirib.Əcnəbilərə əmlak satışı artıb

Dekabrın 13-də lirə dollara qarşı rekord həddə ucuzlaşıb, bir dollar 14.99 lirə olub. Hazırda bir dollar 14.2 lirədir və bu, sentyabrın əvvəlindən 40% zəifləmə deməkdir. (azadliq.org)