""3+3" formatı Ermənistan-Türkiyə dialoqunun başlaya biləcəyi platformalardan biridir, lakin bir mühüm hal nəzərə alınmalıdır". Ordu.az xəbər verir ki, bunu erməni türkşünas Muşeğ Xudaverdyan deyib.

Onun sözlərinə görə, Ermənistan 30 ildir müstəqil dövlətdir, Türkiyə Ermənistanı müstəqil dövlət kimi tanıyıb, lakin Türkiyə Ermənistanla münasibətlərin qurulması üçün ilkin şərtlər qoyur.

"Bu ilkin şərtlərdən biri Qarabağın Azərbaycanın tərkib hissəsi kimi tanınması idi və ikinci şərt də (qondarma – red.) "soyqırımı" ətrafında razılıq əldə edilməsi, tərəflərin bir-birlərinin ərazi bütövlüyünü tanımasıdır", - deyə Xudaverdyan bildirib.

Erməni türkşünas vurğulayıb ki, Ermənistan-Türkiyə münasibətlərinin normallaşması yalnız Ermənistan-Azərbaycan məsələlərində qeyri-müəyyənliklərə aydınlıq gətirdikdən sonra mümkündür.