Rusiya və Türkiyə arasında kosmosun dinc məqsədlərlə tədqiqi sahəsində əməkdaşlığın yaxşı perspektivlər var.

Bunu Rusiya prezidenti Vladimir Putin Yeni il münasibətilə türkiyəli həmkarı Rəcəb Tayyib Ərdoğana ünvanladığı təbrik məktubunda bildirib.


Rusiya lideri vurğulayıb ki, Moskva ilə Ankara arasında virusa qarşı vaksinlərin istehsalı sahəsində də əməkdaşlıq mövcuddur.

Türkiyə prezidentini Yeni il münasibətilə təbrik edən Putin məmnunluqla qeyd edib ki, koronavirus pandemiyası ilə bağlı çətinliklərə baxmayaraq, son vaxtlar Rusiya-Türkiyə əlaqələrinin ilk növbədə, ticarət-iqtisadi, enerji və hərbi-texniki sahələrdə inkişafı üçün çox iş görülüb.

Putin həmçinin əmin olduğunu bildirib ki, Rusiya və Türkiyənin birgə səyləri, ikitərəfli səmərəli əməkdaşlığı, eləcə də beynəlxalq məsələlərdə yaxın tərəfdaşlığı hər iki ölkənin dost xalqlarının rifahı naminə regional əlaqələrin, sabitlik və təhlükəsizliyin möhkəmləndirilməsini təmin edə biləcək.

Mənbə: kremlin.ru