“Ötən il Əfqanıstan 1,28 milyon ton Qazaxıstan unu idxal edib və Özbəkistan və Tacikistanla birlikdə bu məhsulu istehlak edən ilk üç ölkəyə başçılıq edir”.

“AzPolitika.info” xəbər verir ki, bunu Qazaxıstanın Baş nazirinin müavini, Ticarət və İnteqrasiya naziri Serik Jumanqar Astanada keçirilən Qazaxıstan-Əfqanıstan biznes forumda deyib. Nazir deyib ki, Qazaxıstan Əfqanıstan bazarının ən böyük ərzaq tədarükçüsüdür və Qazaxıstan ixracatında ən böyük payı un və buğda təşkil edir.

Baş nazirin müavini bildirib ki, Qazaxıstan üçün Əfqanıstan prioritet un bazarıdır və ümumi un ixracının 70%-ni təşkil edir: “Hazırda biz ixrac səbətinin diversifikasiyası tendensiyası müşahidə edirik. Bizim hesablamalarımıza görə, Qazaxıstanın Əfqanıstana qida, neft-kimya, kimya, metallurgiya, yüngül, maşınqayırma sənayesi üzrə 500 milyon dollar həcmində ixrac potensialı var”.

Baş nazirin müavininin sözlərinə görə, bütün Mərkəzi Asiya ölkələrindən Əfqanıstan ən çox Qazaxıstanla ticarət edir. Ölkələr arasında qarşılıqlı ticarət dövriyyəsi təxminən 1 milyard dollara çatıb, gələcəkdə ticarət həcminin 3 milyard dollara çatdırılması nəzərdə tutulur. Bu il Heratda Qazaxıstanın Ticarət Evi açılıb ki, bu da ölkələr arasında təchizat ixrac-idxalın həcmini artıracaq və şaxələndirəcək.


İlin birinci yarısında Qazaxıstan Əfqanıstan ərazisindən keçən və Pakistanı Mərkəzi Asiya ölkələri, o cümlədən bizimlə birləşdirən ən qısa yol marşrutu üzrə Pakistan kartofunu idxal edib. Onun sözlərinə görə, bu gün Qazaxıstan biznesi regionun bütün ölkələri ilə qarşılıqlı əlaqədədir. Ticarətin təhlükəsizliyini və cəlbediciliyini təmin etmək üçün tərəflər qarşılıqlı optimal şərait yaratmağa razılaşırlar.

2021-ci ildə tranzit nəqliyyat sisteminin genişləndirilməsi üçün Özbəkistan, Əfqanıstan və Pakistanın hakimiyyət orqanları Termez-Məzar-Şərif-Kabil-Pişəvər trans-Əfqan dəmir yolunun uzadılması barədə razılığa gəlib. Bu marşrutun tikintisi təkcə Daşkənd, Kabil və İslamabad üçün sərfəli olmayacaq, həm də Asiya regionunun digər ölkələri, eləcə də Yaxın Şərq üçün ticarət yolları açacaq.

Serik Jumanqar bildirib ki, ölkəsi Mərkəzi Asiya dövlətləri ilə Cənubi Asiya və Yaxın Şərq ölkələri arasında fasiləsiz regionlararası əməkdaşlığı təmin edəcək Məzari-Şərif-Kabil-Peşəvər trans-Əfqan dəmir yolu nəqliyyat dəhlizinin tikintisi təşəbbüsünü yüksək qiymətləndirir. Bu marşrut ticarət-iqtisadi əlaqələrin dinamikasına yeni təkan verəcək.

Qazaxıstan tərəfinin fikrincə, Əfqanıstanla enerji sahəsində əməkdaşlıq üçün yaxşı perspektivlər var. Xüsusilə, neft və qazın hasilatı və nəqli layihələrinin həyata keçirilməsi ölkələrə öz iqtisadiyyatlarını gücləndirməyə imkan verəcək.