Türkiyənin Mətbuat Şurası iki illik fasilədən sonra 2024-cü ildə ermənilərin, yunanların və yəhudilərin çap mediasına maliyyə dəstəyi göstərilməsi barədə qərar qəbul edib.

KONKRET.az xəbər verir ki, İstanbuldakı “Akos” qəzetinin məlumatına görə, Mətbuat Şurasının qərarı ilə milli azlıqların çap mediasına 300 min lirə ayrılacaq və bu vəsait onlar arasında proporsional şəkildə bölünəcək.

Qeyd edək ki, 2022-ci ildən Türkiyə hakimiyyəti sözügedən nəşrlərə maliyyə dəstəyini dayandırmışdı.

Azlıqların media nümayəndələri yüksək inflyasiya şəraitində yeni maliyyə dəstəyinin bir neçə il əvvəlkindən daha böyük olacağını gözləyirdilər, lakin hakimiyyət iki il əvvəl olduğu qədər pul ayırıb.

Milli azlıqların çap mediasına maliyyə dəstəyi Türkiyənin Lozanna müqaviləsi çərçivəsində üzərinə götürdüyü öhdəliklərə uyğun olaraq həyata keçirilir.