"Atalanta" İtaliya Kubokunun finalına vəsiqə qazanıb
26-04-2019, 07:57
"Atalanta" klubu futbol üzrə İtaliya Kubokunun finalına vəsiqə qazanıb.
"Report" xəbər verir ki, Berqamo şəhərinin "Atleti Adzurri" stadionunda baş tutan ½ final mərhələsinin "Fiorentina"ya qarşı keçirilən cavab gürüşü meydan sahiblərinin 2:1 hesablı qələbəsi ilə başa çatıb.
Oyunda ilk qol artıq 3-cü dəqiqədə vurulub: Luis Muryel Federiko Kyezanın ötürməsini qola çevrib. Lakin 11 dəqiqə sonra Yosip İliçiç penaltini dəqiq yerinə yetirərək hesabda bərabərlik yaradıb. Matçda son nöqtəni 69-cu dəqiqədə Alexandro Qomes qoyub.
Komandalar arasında Florensiyada keçirilən ilk görüş 3:3 hesabı ilə nəticələnib.
"Atalanta" İtaliya Kubokunun finalında "Milan"ı mübarizədən kənarlaşdıran "Latsio" ilə qarşılaşacaq.
Turnirin qalibi mayın 15-i paytaxt Romada məlum olacaq.