Hacıqabul rayon poçtundan 2 il əvvəl 1,50 manata aldığım kiçik paketlər 2 manata verilir. Poçtdan bildirildi ki, rüsumlar artdığına görə qiymət dəyişib. Lakin “Azərpoçt”un rəsmi saytından öyrəndim ki, rüsum artmayıb, qiymət isə 1,40 manatdır.

Bu barədə Hacıqabul rayon sakini Maqsud Əsədovun Axar.az-a daxil olan şikayətində qeyd olunub.

O iddia edib ki, bu vaxta qədər poçt tərəfindən aladadılıb.

Məsələ ilə bağlı saytımıza açıqlama verən “Azərpoçt” MMC-nin İctimaiyyətlə əlaqələr şöbəsinin baş mütəxəssisi Mehman Balabəyov bildirib ki, vətəndaş qəbzi təqdim etdiyi halda məsələ araşdırılacaq:

“Rüsumlar arasında qiymət fərqi var. Tariflər ötən həftədən artıb. İstənilən halda vətəndaşın şikayəti qəbzi təqdim etdikdən sonra araşdırılacaq”.