Bütün dünya bilir ki, İlon Musk texnologiya dünyasında inqilabi layihələri ilə tanınan bir sahibkardır. Ancaq son zamanlar siyasi arenada tez-tez xatırlanır.

İndex.az xəbər verir ki, Mask 2024-cü il prezident seçkilərində Donald Trampı açıq dəstəkləməklə diqqəti cəlb etməklə yanaşı, Trampın kampaniyasını dəstəkləmək üçün “Amerika PAC” adlı super PAC yaradıb və həmin PAC-a 75 milyon dollardan çox ianə verib.

Maskın Trampı dəstəkləməsinin səbəbi həddindən artıq tənzimləmələrin innovasiyalara mane olmasıdır. Maskın sözlərinə görə, bu qaydalarla Amerika kosmosda lider olmaq məqsədinə çatmaqda çətinlik çəkir. Mask açıqlamasında deyib:

“Tramp üçün səs vermək Marsa səs verməkdir. Amerikada həddindən artıq tənzimləmənin səbəb olduğu boğulmaya son qoymasaq, biz heç vaxt çox planetli sivilizasiya olmayacağıq”.

Trampın vergi endirimləri və biznes təşviqləri Maskın şirkətləri üçün maliyyə faydaları təklif edir. Xüsusilə “SpaceX” və “Tesla” kimi şirkətlər Tramp administrasiyası zamanı daha az vergi yükü və daha çox təşviqlərlə üzləşə bilər. Bu, Maskın Trampla bağını gücləndirir.

Bundan əlavə, Maskın “xərclərin azaldılması naziri” olmaq planı reallaşarsa, Mask Amerika tarixində ən böyük fərdiləşdirilmiş vergi endirimlərindən birini alacaq. Bu, şirkətlərin vergiyə cəlb edilməsində böyük mənfəət deməkdir.

Maskın Trampı dəstəkləməsində Çindəki biznes maraqları da rol oynayır. “Tesla”nın Çindəki istehsal gücü və bazar payı nəzərə alınarsa, Maskın bu ölkə ilə əlaqəsi önəmli olur.

Burada Trampın Çinə ticarət təzyiqini dəstəkləməsi və yüksək tarifləri müdafiə etməsi də yada düşür. Xüsusilə də bu vəziyyət Maskı ciddi bəlalara sürükləyə bilər. Məhz buna görə də Mask Çin və ABŞ arasında körpü rolunu oynaya bilər.