Almaniyanın Tübingen Universitetinin alimləri tərəfindən aparılan yeni tədqiqat göstərir ki, qarğalar insanlardakına çox bənzəyən həndəsi intuisiyaya malikdirlər. Bu kəşf həndəsənin təkamüldəki kökləri və heyvanlar aləmində yayılmasının anlaşılmasında əsl irəliləyiş hesab olunur.

Bu barədə "Science Alert" məlumat yayıb.

Təcrübə zamanı 11 və 10 yaşlı iki qara qarğa kompüter ekranında göstərilən beş eyni ikiölçülü fiqur arasından fərqli olanını müəyyən edib.

Qarğalar üçün kvadrat kimi bərabərtərəfli və ya düzbucaqlı kimi 90 dərəcəli bucaqları olan düzgün dördbucaqlılar arasında anomaliyanı aşkar etmək daha asan olub. Dördbucaqlılar nə qədər qeyri-adi və nizamsız olsa, qarğalar üçün artıq fiquru müəyyən etmək bir o qədər çətinləşib.

Maraqlıdır ki, qarğalar da insanlar kimi rombda həndəsi nizamlılığı aşkar etməkdə daha çox çətinlik çəkiblər. Bu oxşarlıq qarğalar və insanların həndəsi qavrayışı arasında heyrətamiz yaxınlığı üzə çıxarıb.