Kollektiv Təhlükəsizlik Müqaviləsi Təşkilatı (KTMT) Tacikistana, Əfqanıstanla sərhəddə yaranmış gərginliklə əlaqədar lazımi yardımlar göstərə bilər.

Bu barədə təşkilatın mətbuat katibi Vladimir Zaynetdinov məlumat verib.

"Tacikistan KTMT-yə müraciət edəcəyi təqdirdə, təşkilat Nizamnaməsində nəzərdə tutulan və tələb ediləcək bütün lazımi yardımı təmin edəcək. Bu siyasi, hərbi və hərbi-texniki yardım ola bilər. Hələlik isə Tacikistan sərhədddəki vəziyyətlə bağlı müraciət ünvanlamayıb", - deyə o söyləyib.

Teref.az xatırladır ki, iyunun 22-də radikal "Taliban" hərəkatının silahlı qruplaşmaları Əfqanıstanın Tacikistanla sərhədində yerləşən Kunduz əyalətindəki Şerxan-Bandar sərhəd komissarlığına hücum edib. 134 əfqan əsgəri silahlılara müqavimət göstərə bilməyib və onlar "Panj" nəzarət-buraxılış məntəqəsinin təhlükəsizlik zonasından qaçaraq dövlət sərhədini keçiblər.

Əsgərlər Tacikistana sığınmağa məcbur olublar. Humanitar səbəblərdən Tacikistan sərhədçiləri bir qrup əfqan əsgərinin onların ərazisinə keçməsinə icazə verib. Əsgərlər arasında 1 nəfərin öldüyü, 4 nəfərin isə yaralandığı bildirilir.

/virtualaz.org