İraq 100 milyon dolları Rusiyanın MiQ-29-larına yox, Türkiyənin Bayraktar TB2-lərinə xərcləmək qərarına gəlib.

Ovqat.com-un məlumatına görə, İraq hakimiyyəti bu ölkənin müdafiə departamentinin nümayəndələrinin tövsiyələrinə zidd olaraq, Rusiyanın MiQ-29 qırıcılarının alınmasından imtina edib.

Bildirilir ki, ölkənin səlahiyyətli orqanları öz qərarlarını bu gün “Bayraktar TB2” pilotsuz təyyarələrinin istifadəsinin daha effektiv olması ilə əlaqələndiriblər. Hökumət Türk PUA-larının alınmasına təxminən 100 milyon dollar ayırıb.

“İraq hakimiyyəti Türkiyədən 100 milyon dollara Bayraktar TB2 İHA-nın alınmasına razılıq verib. PUA-lar dağlıq və səhra əraziləri, xüsusən son zamanlar vəziyyətin əlverişsiz olduğu Suriya sərhədini qorumaq üçün istifadə olunacaq”, - deyə Londondan yayımlanan Əl-Ərəbi əl-Cədid” nəşri bildirib.

İddialara görə, İraq hazırda bu ölkədə xidmətdə olan Amerika istehsalı ola F-16 qırıcılarını sataraq 12 Rusiya MiQ-29 qırıcısı ala bilərdi. Lakin, ABŞ-ın təzyiqi ilə Bağdad bu təyyarələrin alınmasından imtina etmək məcburiyyətində qalıb.

Rus ekspertlərinin fikrincə, bir Bayraktar TB2 pilotsuz təyyarəsinin qiymətini nəzərə alsaq, İraq Türkiyədən 20-yə yaxın pilotsuz uçuş aparatı almaq niyyətindədir: “Lakin PUA-lar düşmən təyyarələrinin qarşısını almaq qabiliyyətində olmadığından İraqın hava məkanı müdafiəsiz qala bilər”, - deyə Rusiyada dərc olunan Avia.pro saytı yazır.