Hindistan Hərbi Dəniz Qüvvələri may ayında Amerikanın F-18 Super Hornet döyüş təyyarələrini Hindistanın yeni təyyarədaşıyan Vikrant gəmisində belə təyyarələrin yararlılığını yoxlamaq üçün sınaqdan keçirəcək. AzVision.az xəbər verir ki, bu barədə "Hindustan Times" qəzeti yazıb. Nəşrin məlumatına görə, Amerikanın “Boeing” korporasiyası gələn ay iki F-18 təyyarəsini Hindistan Hərbi Dəniz Qüvvələrinin Qoadakı Hansa aviabazasındakı aviasiya poliqonunda uçuş sınaqları üçün göndərəcək. Testlərin mayın 21-də başlaması gözlənilir. Bu qırıcıların “Vikrant” təyyarədaşıyan gəmisində mümkün yerləşdirilməsi nəzərdən keçirilir.

Hindistanın özünün inşa etdiyi ilk Vikrant, Hindistanın Böyük Britaniyadan müstəqilliyinin 75 illiyini qeyd etdiyi 15 avqust 2022-ci ildə milli donanmaya daxil olmalıdır. Gəmi Rusiya istehsalı olan MiQ-29K/KUB qırıcılarını, həmçinin Rusiyanın Ka-31 və Amerika MH-60R helikopterlərini daşıyacaq. Lakin yerli mətbuatın məlumatına görə, Hindistan tərəfi təyyarələrin digər variantlarını da nəzərdən keçirir.