Şimali Koreya lideri Kim Çen In izah edib ki, yeni kəşfiyyat peykinin buraxılması ölkənin müdafiə hüququnun qanuni şəkildə həyata keçirilməsidir.

“Reuters” bu barədə Koreya Mərkəzi Teleqraf Agentliyinə (KCNA) istinadən məlumat yayıb.

Şimali Koreya liderinin Milli Aerokosmik Texnologiyaya səfərindən hazırlanmış materialda deyilir: “Kim Çen In kəşfiyyat peykindən istifadənin özünümüdafiə hüququnun tam şəkildə həyata keçirilməsi olduğunu bildirib və vurğulayıb ki, ölkənin silahlı qüvvələri belə imkanlardan istifadə etməyə bilməz. KXDR lideri prosesdə iştirak edən alim və mühəndisləri şəxsən təbrik edib”.

Daha əvvəl Kim Çen In bildirib ki, noyabrın 21-də Yer orbitinə buraxılan Mulligen-1 peyki KXDR-in “düşmən qüvvələrin hərbi niyyətlərini və hərəkətlərini” izləyən kosmik mühafizəçisidir. Onun fikrincə, peykin orbitə buraxılmasını qələbə hesab etmək olar.