ABŞ-li həkimlər təlaşa düşüblər. Belə ki, ölümcül ebola virusunun artıq ölkəyə çatdığı ehtimalı var.

Bu barədə "New York Post" qəzeti xəbər verib.

Bildirilir ki, iki nyu-yorklu təhlükəli xəstəlik şübhəsi ilə xəstəxanaya yerləşdirilib. Onlar son zamanlarda bu xəstəliyin tüğyan etdiyi Uqandaya səyahətdən qayıdıblar.

Həkimlər nyu-yorkluların simptomlarının ebolanın xarakterik əlamətləri ilə tam üst-üstə düşdüyünü vurğulayıblar.

Hazırda pasiyentlər təcili yardım şöbəsindən ixtisaslaşmış xəstəxanaya köçürülüblər və həkimlərin 24 saatlıq nəzarəti altındadırlar. Həkimlər diaqnozu təsdiq və ya təkzib edəcək analizlərin nəticələrini gözləyirlər.

Fevralın 3-də Ümumdünya Səhiyyə Təşkilatı xəbərdarlıq edib ki, Uqandada aşkar edilmiş Ebola virusunun yeni ştammı ictimai səhiyyə üçün ciddi risk təşkil edir. Təşkilat həmçinin onun qonşu dövlətlərə potensial ötürülməsini də istisna etməyib.