Macarıstan Aİ-ni Rusiyanın aktivlərindən Ukraynaya yardım üçün istifadə etdiyinə görə məhkəməyə verib
Bu gün, 10:18
Macarıstan hökuməti Avropa İttifaqının Rusiyanın dondurulmuş aktivlərindən əldə olunan gəlirlərin Ukraynaya yardım məqsədilə istifadəsi barədə qərarını məhkəməyə verib.
32gun.az xəbər verir ki, bu barədə yerli Portfolio nəşri məlumat yayıb.
Məlumata görə, Budapeşt iddianı iyul ayında təqdim edib. Lüksemburqdakı Ümumi Yurisdiksiya Məhkəməsi işi avqustun 25-də icraata qəbul edib. Cavabdehlər qismində Avropa İttifaqı Şurası və Avropa Sülh Fondu çıxış edəcək.
Macarıstan hökuməti Şuranın qərarının ləğvini tələb edir və sənəddə bu təşəbbüsün Budapeştin mövqeyi nəzərə alınmadan qəbul olunduğu qeyd olunur.
Avropa Komissiyası isə 11 avqustda bildirib ki, Rusiya Mərkəzi Bankının dondurulmuş aktivlərindən əldə edilən 1,6 milyard avro məbləğində üçüncü tranş Ukraynaya dəstək üçün ayrılıb. Gəlirlər Aİ-nin tətbiq etdiyi sanksiyalar nəticəsində dondurulmuş aktivlərdən əldə olunur.
