İlon Maskın ABŞ Hökumətin Səmərəliliyi Ofisinin (DOGE) başlatdığı təmizləmələr zamanı işdən çıxarılan müxtəlif ABŞ dövlət qurumlarının yüzlərlə keçmiş məmuru yenidən dövlət qulluğuna qayıda bilər.
Yeniavaz.com xəbər verir ki, bu barədə mənbələrə istinadən “Associated Press” (AP) məlumat yayıb.
“Ümumi Xidmətlər Administrasiyası həftənin sonuna qədər dövlət vəzifələrində çalışan işçilərə bərpanı qəbul etmək və ya rədd etmək üçün vaxt verib. Qəbul edənlərin 7 aylıq ödənişli məzuniyyətdən sonra oktyabrın 6-da işə qayıdacaqları gözlənilir”, - hesabatda deyilir.
Qeyd olunur ki, ixtisarların sürətlə getməsi səbəbindən agentlik kadr çatışmazlığı səbəbindən öz əsas funksiyalarını belə yerinə yetirə bilməyib.
Oxşar vəziyyət ABŞ-nin Daxili Gəlir Xidmətində, eləcə də Əmək Departamentində və Milli Park Xidmətində baş verir: bu qurumlar əvvəllər işdən çıxarılan işçiləri yenidən işə götürməyə başlayıblar.
Xatırladaq ki, biznesmen İlon Mask 2025-ci ilin yanvarında DOGE-ın başına keçdi. Agentliyin missiyası federal hökumətdə islahatlar aparmaq, xərcləri azaltmaq və inzibati strukturu modernləşdirmək idi.
“Reuters”in məlumatına görə, proqram 260.000 federal mülki işçinin ixtisarı ilə nəticələnib ki, bu da ümumi işçilərin təxminən 12%-ni təşkil edir.
İslahat tərəfdarları agentliyin 160 milyard dollara qədər qənaət etdiyini iddia edirlər.