ABŞ Ədliyyə Nazirliyi “Alphabet” şirkətinin rəqəmsal reklam imperiyasının əsas bölmələrinin ayrılmasını məcburi etmək üçün federal məhkəməyə rəsmi müraciət edib.

Valyuta.az xəbər verir ki, bu tələb onlayn reklam sektorunu yenidən formalaşdıra biləcək böyük antitrest mübarizəsinin yeni mərhələsini işə salıb.

Bazar ertəsi başlayan məhkəmə prosesinin ikinci mərhələsində prokurorlar, “Google”un reklam birjası və nəşriyyatların reklam sahəsi satmaq üçün istifadə etdiyi alətlərin mərhələli şəkildə əlindən çıxarılmasını tələb edib. Bu müraciət, aprel ayında hakim Leoni Brinkemanın verdiyi qərara əsaslanır. Həmin qərarda, “Google”un reklam bazarının mühüm sahələrini “qəsdən inhisara çevirdiyi” təsbit olunmuşdu.

Hakim Brinkeman bildirmişdi: "On ildən artıqdır ki, "Google" nəşriyyat reklam serverini və reklam birjasını bir-birinə bağlayaraq özünə inhisar qurmaq və onu qorumaq imkanı yaradıb".

Ədliyyə Nazirliyinin antitrest bölməsinin rəhbəri Qeyl Sleyter bu addımı “açıq veb reklamçılığı üçün rəqabəti azad etmək” istiqamətində cəsarətli bir təşəbbüs kimi qiymətləndirib.

“Google”un vəkili Karen Dann isə təklif olunan həlləri “həddindən artıq” adlandıraraq bunun həm istehlakçılara, həm də innovasiyalara zərər verəcəyini deyib. Şirkət bunun əvəzində reklam təklifləri ilə bağlı məlumatların rəqiblərlə paylaşılması kimi davranışsal həllər təklif edib.