İngiltərənin "Çarlton" qadın futbol klubunun futbolçusu Madelene Vrigt adının qarışdığı qalmaqallardan sonra komandadan qovulub.

Fanat.Az xəbər verir ki, "Instagram"da paylaşdığı videolarla gündəmdən düşməyən gənc fubolçu əvvəlcə sükan arxasında şampan içmiş və bunu videoya çəkərək paylaşmışdı. Daha sonra o, kiçik bir itə maşın sürdürərək video yayıb.

Bu dəfə isə Madelenenin içində narkotik tərkibli qaz olan şarların istifadə olunduğu əyləncə məclisinə qatıldığı müəyyənləşib. Futbolçu bu addımından sonra klubundan qovulub.

"Klub olaraq videodan xəbərimiz var. Komandanın dəyərləri ilə üst-üstə düşməyən bu görüntülər bizi məyus etdi. Futbolçu çox peşman olub, amma komandadan göndərilib. Klub olaraq onun davranışlarını qəbul edə bilməzdik. Hər şeyə rəğmən oyunçumuz bizim üçün dəyərlidi. Hər hansı bir dəstəyə ehtiyacı olarsa, bizə müraciət edə bilər" deyə "Çarlton"un açıqlamasında bildirilir.