Teref. info - VKC karate idman növü üzrə İsmayıllıda Respublika çempionatı
Rayon İcra Hakimiyyətinin diqqətinin nəticəsi olaraq İsmayıllı Olimpiya İdman Kompleksi gündəlik fəaliyyətdədir və müxtəlif idman növləri üzrə Respublika yarışları, təlim -məşq toplantıları üçün də bura məkan seçilir.
Azərbaycan Respublikası Gənclər və İdman Nazirliyinin təşkilatçılığı, rayonun aid qurumlarının fəal iştirakı ilə 13 mart 2016-cı il tarixdə VKC karate idman növü üzrə uşaqlar, yeniyetmələr və gənclər arasında Azərbaycan çempionatının açılışı olub. 36 komandanın və 160 idmançının iştirak etdiyi çempionata ev sahibliyini İsmayıllı Olimpiya İdman Kompleksi edib. VKC Katare Idman Federasiyasının sədri Nurəddin Quliyev, rayon gənclər və idman idarəsinin rəisi Taleh Salehov rayon icra hakimiyyətinin məsul əməkdaşı Rövşən Yəhyayev açılışda çıxış edərək yaradılan şəraitə görə ölkə rəhbərliyinə minnətdarlıqlarını bildiriblər.
Rayon komandasının baş məşqçisi Anar Həsənov gənclərin və yeniyetmələrin fiziki hazırlığına, idmanın inkişafına, sosial həyatın yaxşılaşmasına göstərdiyi diqqətə və qayğıya görə rayon icra hakimiyyətinin rəhbərliyinə karateçilər adından təşəkkürünü çatdırıb.
14 mart 2016-cı il tarixdə çempionat yekunlaşıb. Gərgin keçən yarışlar nəticəsində komanda birinciliyində İsmayıllı rayonu birinci, Bakı şəhəri ikinci və Gəncə şəhəri üçüncü yeri tutub.İsmayıllı komandasının 10 üzvü müxtəlif çəki dərəcələrində Respublika çempionu olublar. Birinci yer tutanlar Riqada keçiriləcək Avropa çempionatında iştirak edəcəklər.
Yarış iştirakçıları məşqçilərlə birlikdə rayonda davam edən inkişaf istiqamətləri, abadlıq və quruculuq işləri ilə yaxından tanış olmağı da yaddan çıxarmayıblar.
teref.az