"Sassuolo” və İtaliya millisinin cinah oyunçusu Domeniko Berardinin vətəri yırtılıb və to, əxminən 6 ay yaşıl meydanlardan kənarda qalacaq.

Qaynarinfo xəbər verir ki, bu barədə İtaliya klubunun mətbuat xidməti məlumat yayıb.

Futbolçu əməliyyat olunacaq. Bununla da Berardi 2024-cü ildə Almaniyada keçiriləcək Avropa çempionatının oyunlarında iştirak edə bilməyəcək.

"Bu səhər aparılan müayinə zamanı Domeniko Berardinin sağ ayağında vətərinin tam yırtıldığı aşkar edilib. Çərşənbə axşamı, martın 5-də futbolçu əməliyyat olunacaq”, deyə "Sassuolo"nun mətbuat xidmətinin açıqlamasında bildirilir.

Berardi 2018-ci ildən İtaliya millisində çıxış edir. Milli komandanın heyətində cinah oyunçusu 2020-ci il Avropa çempionatının qalibi olub.
Bu mövsüm futbolçu "Sassuolo"nun heyətində bütün turnirlərdə 18 oyun keçirib, 9 qol vurub və 3 məhsuldar ötürmə edib.

Futbolçunun hazırkı klubu ilə müqaviləsi 2027-ci ilin iyun ayının sonuna qədər qüvvədədir. "Transfermarkt" internet portalına görə futbolçunun təxmini dəyəri 20 milyon avrodur.