"Sonuncu oyunumuza baxanda uşaqların ürəyi və gözləri yanır".

Musavat.com saytının məlumatına görə, bu sözləri “Qarabağ”ın futbolçusu Maksim Medvedyev deyib.

UEFA Avropa Liqasının qrup mərhələsində çıxış edən Ağdam klubu növbəti oyununu sabah öz meydanında PAOK-a qarşı keçirəcək.

“Qarabağ”ın müdafiəçisi matçdan öncə keçirilən mətbuat konfransında bu fikirləri səsləndirib: “Sonuncu oyunumuza baxanda uşaqların ürəyi və gözləri yanır. Hamımız PAOK qarşısında özümüzü yaxşı tərəfdən göstərməyə çalışacağıq. Azarkeşlərimizi sevindirmək üçün əlimizdən gələni edəcəyik. Vuruşmağa hazırıq. Bizi necə bir oyunun gözlədiyini bilirik”.

- Millidəki ruhu “Qarabağ”a daşıya bilmisinizmi?

- Həm millidə, həm də “Qarabağ”da bu cür vacib oyunlar öncəsi əla ruh yüksəkliyi olur. Motivasiya bizdə yüksək səviyyədədir. Bizim futbolçularda döyüşkən ruh var. Vuruşmağa hazırıq, özümüzə inanırıq. Millinin heyətində son görüşlərdə yaxşı nəticə əldə etmişik. Bunu “Qarabağ”da da davam etdirmək istəyirik. Sabahkı matçın vacibliyini bilirik və buna uyğun hazırlaşmışıq.