Bu gün 2017-ci ildə Bakıda keçiriləcək IV İslam Həmrəyliyi Oyunlarına hazırlıq məqsədilə Koordinasiya Komissiyasının 4-cü iclası işinə başlayıb.
"Report"un məlumatına görə, Oyunların icraçı direktoru, gənclər və idman naziri Azad Rəhimov, İslam Həmrəyliyi İdman Federasiyasının 2-ci vitse-prezidenti Çingiz Hüseynzadı, federasiyanın baş katibi Faisal Abdulaziz Al-Nassar, federasiyanın 1-ci vitse-prezidenti, Əlaqələndirmə Komissiyasının sədri, polkovnik Hamad Kalkaba Malboum və digər rəsmilər iştirak edib.
İki gün davam edəcək iclasın ilk görüşündə yarışda iştirak edəcək idmançıların sayı, idman növləri, nəqliyyat, infrastruktur, könüllülərlə işin qurulması və digər məsələlər müzakirə edilir.
Koordinasiya Komissiyasının iclasının 2-ci günündə idmançıların iştirak, idman yarışları, marketinq, yayım, komersiya məsələləri, açılış və bağlanış mərasimləri ilə bağlı müzakirələr olacaq.
Qeyd edək ki, Koordinasiya Komissiyasının 3-cü iclası bu ilin mayın 12-də keçirilib.