Qəbələdə anaları qətlə yetirilən 3 azyaşlı uşaq evinə verilməyəcək.

Bu barədə AzVision.az-a Ailə, Qadın və Uşaq Problemləri üzrə Dövlət Komitəsinin Hüquq şöbəsinin müdiri Taliyə İbrahimova deyib. O qeyd edib ki, uşaqlar atalarının valideynlərinə veriləcək.

“Ailələr arasında münaqişə olduğu üçün ananın qohumları uşaqları internat evinə verməyi tələb edirdi. Amma buna məsləhət görülmədi. Ata evində normal şərait olduğundan onlar uşaq evinə verilməyəcək. Hazırda azyaşlılar nənə-babasının himayəsindədir. Qarşı tərəf buna etiraz etsə, məsələyə məhkəmədə baxılacaq”.

T.İbrahimova Zərdabda anaları qətlə yetirilən və SOS uşaq kəndinə yerləşdirilən azyaşlıların nəzarətdə olduğunu və onlarla reabilitasiya işinin aparıldığını bildirib. “Uşaqların 3-ü bir yerdədir. Uşaq və ailələrə dəstək mərkəzi onları nəzarətdə saxlayır. Həmin uşaqların övladlığa götürlməsi hələki məsləhət deyil. Onları bir-birindən ayırmaq olmaz, güclü stress yaşayırlar”.

Qeyd edək ki, oktyabr ayında Zərdab və Qəbələdə iki qadın həyat yoldaşı tərəfindən amansızcasına qətlə yetirilib.