Moskvanın Taqanski Rayon Məhkəməsi növbəti dəfə "Telegram" messencerini cərimələyib.

TASS xəbər verir ki, cərimə 4 milyon rubl təşkil edib.

İnzibati cəzaya səbəb messencer administrasiyasının Rusiya Federasiyası ərazisində qadağan olunmuş məlumatları silməkdən imtina etməsi olub.

Məhkəmə "Telegram" messencerini Rusiya Federasiyasının İnzibati Xətalar Məcəlləsinin 13.41-ci maddəsinin 2-ci hissəsini pozmaqda təqsirli bilib (“Sayt sahibinin Rusiya Federasiyasının qanunvericiliyinə uyğun olaraq silinməli olan məlumatları silməməsi”). Məhkəmə şirkətə 4 milyon rubl məbləğində inzibati cərimə tətbiq etmək qərarına gəlib.

"Telegram"ın Rusiya Federasiyasında qadağan olunmuş məlumatları silməməsi ilk dəfə deyil. 2021-ci ilin fevral ayından sosial şəbəkələrin özünə nəzarəti haqqında qanun qüvvəyə minib ki, ona görə də internet platformaları qadağan olunmuş məzmunu müstəqil müəyyən edib bloklamalıdır. Onlardan həmçinin xüsusi rəy forması vasitəsilə istifadəçilərə mənfi məzmunu bildirmək imkanı təqdim etmələri tələb olunur. Bundan əlavə, hər il sosial şəbəkələrdə bu sahədə görülən işlərlə bağlı hesabat dərc edilməlidir.