Redaksiyamıza Rabitə və İnformasiya Texnologiyaları Nazirliyinin tabeliyində olan Hərbiləşdirilmiş Mühafizə İdarəsinin rəisi Telman Hüseynova qarşı ağır ittihamların yer aldığı informasiya daxil olub. Belə ki, DİA.AZ-ın elektron poçtuna göndərilən məlumatda Telman Hüseynov Eldar Mahmudovun əlaltısı kimi təqdim olunur...

Dia.az-a verilən xəbərdə deyilir: "Rabitə və İnformasiya Texnologiyaları Nazirliyinin tabeliyində olan Hərbiləşdirilmiş Mühafizə İdarəsində baş verən özbaşınalıqlar heç bir qurumda mövcud deyil. Eldar Mahmudovun yaxın qohumu Mahmud Mahmudov da, Vəli Mahmudov da məhz HMİ-də rəis müavini işləyiblər. Ancaq Tərlan Nəsirovu qanunsuz olaraq, hədə-qorxu ilə həmin vəzifədən kənarlaşdırdılar. İdarənin rəisi Telman Hüseynov isə idarə yaranan gündən rüşvətxorluqla məşğuldur".

Bildirək ki, bu ittihamlardan əlavə mənbə daha ağır ittihamlar da səsləndirir. Dia.az-a daxil olan xəbərdə deyilir: "HMİ-də elə bir mühafizəçi yoxdur ki, işə pulsuz düzəlmiş olsun. HMİ-də bu gün 906 mühafizəçi işləyir. Bu da Telman Hüseynovun nə qədər qazanc əldə etməsini təxmini olaraq ortaya qoyur. Hər işçidən ən azından 1000 manatdan yığılarsa, 1 milyon manat təkcə işəgötürmədən əldə olunur.

İşçilər isə öz işlərini yerinə yetirmirlər. Dövlətin idarələrində mühafizə ən aşağı formada təşkil olunur. Dövlət qurumlarının HMİ-yə etibar olunan qapıları karvansara qapılarını xatırladır".

Əlavə bilgilərimiz olacaq. Qarşı tərəfi də dinləməyə hazırıq...