Bugünlərdə "Hürriyyət"in redaksiyasına müraciət edən Bakı şəhəri, Xətai rayonu, məhəllə 1197, Həsən Salmani, ev 1b, mənzil 75 ünvanında qeydiyyatda olan Bəhram Əlövsət oğlu Yolçuyev 2013-cü ildə mülkiyyətində olan əkinə yararlı təsərrüfat təyinatlı torpaq sahəsinin qanunsuz olaraq zəbt edildiyini, tanımadığı şəxslər tərəfindən mənimsənilərək fərdi yaşayış evinin inşa edildiyini bildirib.

Belə ki, pozulmuş hüquqlarının bərpası məqsədiylə müxtəlif tələblərlə aidiyyəti üzrə məhkəmələrə müraciət etdiyini vurğulayan Bəhram Yolçuyevin sözlərinə görə, Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin 4 saylı Ərazi İdarəsi ona məxsus olan torpaq sahəsinə başqa şəxslərin adlarına saxta sənəd verib: "Mən Abşeron rayon 2 saylı dövlət notariat kontorunun 22.05.2007-ci il tarixli, 4ə-5-782 nömrəli "Alıcı və Satıcı arasında bağlanmış alqı-satqı müqaviləsi" ilə dövlət aktına əsasən Abşeron rayonu, Mehdiabad qəsəbəsində yerləşən sahəsi 0,673778 ha olan torpaq sahəsini əldə etmişəm. Alqı-satqıdan sonra keçmiş Azərbaycan Respublikası Dövlət Torpaq və Xəritəçəkmə Komitəsinin Abşeron rayon şöbəsinin əməkdaşları tərəfindən dövlət aktında qeyd olunan torpaq sahəsi akta və Mehdiabad qəsəbəsinin islahat xəritəsinə uyğun şəkildə naturada mənə təhvil verilib. Təxminən, 2014-cü ilin əvvəllərində tanımadığım şəxslər mülkiyyətimdəki əkinə yararlı təsərrüfat təyinatlı torpaq sahəsini zəbt edərək fərdi yaşayış evi inşa ediblər. Pozulmuş hüquqlarımın bərpası üçün müxtəlif tələblərlə aidiyyəti üzrə məhkəmələrə müraciət etmişəm. Məhkəmə araşdırmaları zamanı məlum olub ki, torpaq sahəmdən 2269 metr aralıda, Binəqədi-Novxanı yolunun kənarında yerləşən, Yaşar Məmməd İsgəndərov oğlu xüsusi mülkiyyətində olan 0,38 ha torpaq sahəsinin 0,28 hissəsini 13.02.2013-cü il tarixdə bağışlama müqaviləsi əsasında bacısı Sevil Məmməd qızı İsgəndərovaya bağışlayıb, həmin torpaq sahəsinə dair Sevilin adına çıxarış və plan ölçü sənədi verilib. Plan ölçü sənədi tərib edilərkən Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin 4 saylı Ərazi İdarəsi tərəfindən saxtakarlığa yol verilərək, Sevilin adına tərtib olunmuş plan ölçü sənədində torpaq sahəsinin koordinatları, ölçüləri və konfiqurasiyası tamamilə fərqli şəkildə tərtib olunaraq mənim mülkiyyətimdə olan torpaq sahəsinə işlənib. Elə həmin dövrdə də mülkiyyətimdə olan və Sevilin adına işlənmiş 0,28 ha torpaq sahəsi 2-3 sot hissələrə bölünərək ayrı-ayrı şəxslərə satılıb və məhkəmə qərardadı ilə tikinti aparılmasının qadağan edilməsinə baxmayaraq, təsərrüfat təyinatlı torpaq sahəsində qanunsuz olaraq fərdi yaşayış evləri və yarımçıq tikililər inşa edilməklə torpaq sahəm yararsız hala salınıb".

Şikayətçi iddia edir ki, onun torpaq sahəsinin plan ölçü sənədi də dövlət aktında göstərilən koordinatlardan kənara, yəni digər dövlət aktlarına əsasən qonşuların müliyyətində olan torpaq sahələrinin üzərinə işlənib: "Onu da bildirim ki, tərəfimdən cavabdehlər Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 4 saylı Ərazi İdarəsinə, İsgəndərova Sevil Məmməd qızına, Babayev Nemət Asif oğluna, Piriyev Əbülfət Salah oğluna, Mustafayev Kamran Qasım oğluna, Səfərova Minəvər Şahvələd qızına, Orucov Əlövsət Həsən oğluna, Ağazadə Rəşad Fərhad oğluna, Fətullayev Xəzər Vaqif oğluna, Əkbərov Faiq Ramiz oğluna, Babayev Baba Ədalət oğluna, Məmmədov Sahib Şamil oğluna, Hüseynov Sənan Rafiq oğluna, maraqlı şəxslər Abşeron rayonu 1 və 2 saylı notariat kontorlarına qarşı "daşınmaz əmlakın alqı-satqı müqavilələrinin, çıxarışların və torpaq sahəsinin planı və ölçüsü sənədlərinin ləğv edilməsi, torpaq sahəsində cavabdehlər tərəfindən inşa edilmiş özbaşına tikililərin cavabdehlərin vəsaiti hesabına sökülərək əvvəlki vəziyyətinin bərpa olunması və mülkiyyətimdə olan torpaq sahəsinin cavabdehlər tərəfindən boşaldılaraq mənə təhvil verilməsi tələbinə dair" iddiam Abşeron Rayon Məhkəməsinin 5 mart 2019-cu il tarixli qətnaməsi ilə təmin edilib. Bundan başqa, Sumqayıt Apellyasiya Məhkəməsi Mülki Kollegiyasının 27 dekabr 2019-cu il tarixli qətnaməsi ilə həmin qətnamədən cavabdehlər tərəfindən verilmiş apellyasiya şikayəti qismən təmin edilərək, Abşeron Rayon Məhkəməsinin qeyd etdiyim qətnaməsi ləğv edilib və iddia tələbinin təmin edilməsi barədə yeni qətnamə qəbul edilib. Ali Məhkəmənin Mülki Kollegiyasının 28.07.2020-ci il tarixli qərarıyla isə cavabdeh Babayev Nemət Asif oğlunun kassasiya şikayəti qismən təmin edilib, Sumqayıt Apellyasiya Məhkəməsi Mülki Kollegiyasının 27 dekabr 2019-cu il tarixli qətnaməsi kassatorun mübahisələndirdiyi hissədə (İsgəndərova Sevil Məmməd qızının adına verilmiş çıxarışın etibarsız hesab olunması, onun Babayev Nemət Asif oğluna satmış olduğu torpaq sahəsinə dair əqdin etibarsızlığı və həmin torpağa dair sonradan həyata keçirilmiş əqdlərin və çıxarışların etibarsızlığı, həmin torpaq sahəsində inşa edilmiş tikililərin sökülməsi, əvvəlki vəziyyətə bərpa edilməsi, torpaq sahəsinin boşaldılaraq iddiaçıya təhvil verilməsi hissəsində) ləğv edilib və işə həmin hissədə apellyasiya qaydasında yenidən baxılması üçün həmin məhkəməyə qaytarılması qərara alınıb. Sumqayıt Apellyasiya Məhkəməsi Mülki Kollegiyasının 23.09.2020-ci il tarixli qərardadı ilə cavabdehlərin apellyasiya şikayətləri qismən təmin edilib, Abşeron Rayon Məhkəməsinin 5 mart 2019-cu il tarixli qətnaməsi qismən ləğv edilib".

Nəzərinizə çatdıraq ki, bundan sonra Bəhram Yolçuyev Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 4 saylı Ərazi İdarəsi tərəfindən İsgəndərova Sevil Məmməd qızının adına verilmiş 18 fevral 2013-cü il tarixli 0144613 saylı çıxarışın və buna müvafiq olaraq 16.02.2013-cü ildə tərtib edilmiş 3080130046544 saylı reyestr nömrəli "torpaq sahəsinin plan və ölçü" sənədinin ləğv edilməsi tələbi ilə Sumqayıt İnzibati Məhkəməsinə müraciət edib: "Sumqayıt İnzibati Məhkəməsinin 2 aprel 2021-ci il tarixli qərardadı ilə Babayev Baba Ədalət oğlu, Orucov Əlövsət Həsən oğlu, Babayev Nemət Asif oğlu, Fətullayev Xəzər Vaqif oğlu, Ağazadə Rəşad Fərhad oğlu, Əkbərov Faiq Ramiz oğlu, Abdullayeva Afaq Əziz qızı, Hüseynov Sənan Rafiq oğlu, Məmmədov Sahib Şamil oğlu və Zeynalov Samir Sürəddin oğlu iş üzrə üçüncü şəxslər qismində məhkəmə icraatına cəlb edilib. Onu da qeyd edim ki, həmin məhkəmənin 13.04.2022-ci il tarixli qərarı ilə Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 4 saylı Ərazi İdarəsi tərəfindən İsgəndərova Sevil Məmməd qızının adına verilmiş çıxarış və "torpaq sahəsinin plan və ölçü" sənədi ləğv edilib. Lakin Ali Məhkəmənin 06.05.2022-ci tarixli qərarı ilə cavabdehlərin kassasiya şikayəti təmin edilərək, Sumqayıt Apellyasiya Məhkəməsinin İnzibati Kollegiyasının 14 dekabr 2021-ci il tarixli qərarı ləğv edilib və iddiam mümkün sayılmayıb. Həmin qərarda iddiamın mümkünsüzlüyü əsaslandırılmayıb, Sumqayıt İnzibati Məhkəməsinin 2-1(085)-21/2019 saylı qərarı nəzərə alınmayıb. Halbuki, həmin qərarla mübahisəli yerin dövlət aktına əsasən ərazisinin yerquruluşu (bölgü) layihəsinə mənə məxsus olması öz təsdiqini tapıb, bu səbəbdən də mülkiyyətimdə olan torpaq sahəsinin mərz nişanlarının qoyulması, qonşu torpaq mülkiyyətçilərinin adları göstərilməklə naturada mənə tanıdılması öhdəliyi Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 4 saylı Ərazi İdarəsinə həvalə edilib. Həmin qərar qanuni qüvvəsini alsa da, Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 4 saylı Ərazi İdarəsinin əməkdaşları tərəfindən bu günədək icra olunmur".

Şikayətçinin sözlərinə görə, Ali Məhkəmənin hakimləri barəsində ədalətsiz qərar çıxarmaqla dövlət orqanlarının bu iş üzrə cinayətlərini, saxtakarlıqlarını, onun təsərrüfat təyinatlı torpaq sahəsinin təyinatının qeyri-qanuni yolla dəyişdirilməklə qanunsuz yaşayış evləri inşa edilməsinə göz yummalarını ört-basdır etməyə çalışıb: "Bu səbəbdən də "Hürriyyət" qəzeti vasitəsi ilə müvafiq qurumlara müraciət edərək, xahiş edirəm ki, ədalətsizliyə yol vermiş, məni 10 ildən artıq müddət ərzində məhkəmələrdə süründürən hakimlər və reyestr xidmətinin qanunsuzluğa yol vermiş işçiləri barəsində ciddi tədbir görülməsində və mülkiyyət hüququmun bərpa olunmasında köməklik göstərsinlər. Həmçinin, Sumqayıt İnzibati Məhkəməsinin 2-1(085)-21/2019 saylı qərarı ilə yerquruluşu (bölgü) layihəsinə əsasən və 25.06.2007-ci il tarixli seriya MH 0011477 saylı çıxarışa uyğun olaraq mülkiyyətimdə olan 0,673778 ha torpaq sahəsinin mərz nişanlarının qoyulması, qonşu torpaq mülkiyyətçilərinin adları göstərilməklə naturada mənə tanıdılması öhdəliyinin cavabdeh Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 4 saylı Ərazi İdarəsinin üzərinə həvalə edilməsi barədə qərarının da bu günə kimi icra edilməməsini nəzərə alaraq, həmin qərarın da icra edilməsinə köməklik göstərsinlər".

"Hürriyyət"