Hesablama Palatasının yoxlaması İbrahim Cəfərovu çətin vəziyyətə salıb. Gəncə şəhərində yerləşən Azərbaycan Dövlət Aqrar Universitetinin fəaliyyəti adıçəkilən təhsil müəssisəsinin tələbələri, eləcə də onların valideynləri tərəfindən kəskin şəkildə tənqid olunur.

İbrahim Cəfərovun rektoru olduğu universitetdə bir sıra xoşagəlməz hallar yaşanmaqdadır. Hazırda universitetdə struktur bölmə kimi tədris-təcrübə təsərrüfatı, tədris, elm, kadrlar, tələbə, ümumi, redaksiya-nəşriyyat, informasiya texnologiyaları və innovasiya, beynəlxalq əlaqələr, qiyabi təhsil, təcrübə və işədüzəltmə şöbələri, arxiv, elm, təhsil və cümhuriyyət muzeyi, 2 sahəvi elmi-tədqiqat laboratoriya, magistr hazırlığı, distant və əlavə təhsil mərkəzləri, kitabxana, mətbəə və «Aqrar mütəxəssis» qəzetinin redaksiyası, 7 fakültə (aqronomluq, aqrotexnologiya, baytarlıq təbabəti və zoomühəndislik, mühəndislik, elektroenergetika və informasiya texnologiyaları, aqrar iqtisadiyyat, aqrobiznes və idarəetmə) və 30 kafedranın fəaliyyət göstərdiyini vurğulayan mənbə bildirir ki, Azərbaycan Dövlət Aqrar Universitetində tələbələri hansısa razılaşmaların müqabilində aylığa, illiyə dərslərdən azad edirlər:
«Deyilənlərə görə, İbrahim Cəfərovun rektoru olduğu təhsil müəssisəsində çalışan müəllimlərin və tələbələrin adına yazdırılan sanatoriya putovkaları da satışa çıxarılır. Onu da qeyd edim ki, universitetin aqrotexnologiya fakültəsinin dekanı Elman Mövsümov rektorla birgə ali təhsil ocağını sanki şəxsi biznes obyektləri kimi idarə edirlər.
Belə ki, Elman Mövsümov İbrahim Cəfərovun tapşırığına əsasən universitetə ikinci imtahan adı ilə daxil olan tələbələrin qəbulunu həyata keçirir. Məhz bu cür fəaliyyət nəticəsində rektor İbrahim Cəfərovla dekan Elman Mövsümov Gəncə və Bakı şəhərlərində çoxsaylı obyektlərə, mülklərə sahib olublar».
Aqrotexnologiya fakültəsinin dekanının Azərbaycan Dövlət Aqrar Universitetinə keçmiş kənd təsərrüfatı naziri İsmət Abbasovun göstərişi ilə təyinat aldığını qeyd edən məlumatlı şəxs iddia edir ki, bir vaxtlar universitetin kafedra müdiri işləyən Elman Mövsümov 1999-2003 cü illərdə təhsil ocağından aralanaraq bir müddət siyasi fəaliyyətlə məşğul olub:
«Belə ki, dekan keçmiş spiker Rəsul Quliyevin başçılıq etdiyi partiyanın Gəncə təşkilatının rəhbərlərindən biri olub və 2003-cü il prezident seçkilərindən sonra Rəsul Quliyevin partiyasından gedərək bir müddət müəllimlik etmiş, sonrə isə İsmət Abbasovun köməkliyi ilə Azərbaycan Dövlət Aqrar Universitetinin aqrotexnologiya fakültəsinin dekanı təyin olunmuşdur.
Deyilənlərə görə, rektor İbrahim Cəfərovun Elman Mövsümovla münasibətləri İsmət Abbasova görə yaranıb və bu «ittifaq» öz nəticəsini verib. Onu da nəzərinizə çatdırım ki, Elman Mövsümov bu gün də eks-spikerlə əlaqələrini tam kəsməyib. Hətta bu, azmış kimi, o, İbrahim Cəfərovun da Rəsul Quliyevlə yaxınlaşdırmağa can atır».
Əldə etdiyimiz informasiyada o da deyilir ki, Azərbaycan Dövlət Aqrar Universitetinin rektorunun əsaslı gəlir yerlərindən biri də ali təhsil ocağının nəzdində fəaliyyət göstərən İxtisasartırma və Təkmilləşdirmə şöbəsidir: «İxtisasartırma və Təkmilləşdirmə şöbəsi kənd təsərrüfatı kadrlarının peşə ustalığının, elmi nəzəri biliklərinin genişləndirilməsi, elmi və texnikanın ən yeni naliyyətlərinin mənimsənilməsi, həmçinin kənd təsərrüfatı mütəxəsisləri üçün Kənd Təsərrüfatı Nazirliyinin göndərişi və ya vətəndaşla bağlanmış fərdi müqavilələr əsasında kənd təsərrüfatının sahələri üzrə (baytarlıq, zootexnika, mexanikləşdirmə, elektirikləşdirmə, aqronomluq, bitki mühafizəsi, meliorsaiya, ekologiya, kənd təsərrüfatı iqtisadiyyatı, aqrar siyasət və s.) istisasartırma kurslarının təşkili ilə məşğuldur. Odur ki, ixtisasını dəyişmək istəyənlər İxtisasartırma və Təkmilləşdirmə şöbəsinə qəbul olmaq üçün Azərbaycan Dövlət Aqrar Universitetinin rəhbərliyi tərəfindən irəli sürülən «tələb»lərə əməl etməlidirlər. Yalnız bundan sonra onlar ixtisaslarını dəyişə bilərlər». Bir müddət öncə Hesablama Palatasının Azərbaycan Dövlət Aqrar Universitetində genişmiqyaslı yoxlama apardığını vurğulayan mənbənin bildirdiyinə görə, həmin yoxlama zamanı müxtəlif şəxslərin adına yazılan 230 «ölü»ştat nəticəsində mənimsənilən 270 min manat vəsait İbrahim Cəfərovu çətin vəziyyətə salıb: «Araşdırma zamanı məlum olub ki, universitetin nəzdində olan 5 elmi sahəvi labaratoriyada (Torpağın və ətraf mühitin ekoloji monitorinqi, Taxıl və paxlalı bitkilər, Meyvə tərəvəz və suptropik bitki genefondunun yaradılması becərilmə texnologiyasının işlənməsi, Qoyunların infeksiyon xəstəliklərinii öyrənən sahəvi-elmi tədqiqat, Aqrar sahədə alternativ enerji mənbələrindən istifadə labaratoriyaları) təcrübə aparam işçilərin sayı azı 5 dəfə artırılıb və həmin «ölü can»ların adına əməkhaqqı yazılaraq mənimsənilib. Bundan başqa, universitetin 4 labaratoriyasında 70-dən çox şəxsin adı iş cədvəlində yazılsa da, əməkhaqqlar rəhbərliyə çatıb. Lakin bu boyda faktların üstünün açılmasına baxmayaraq, hələ də Azərbaycan Dövlət Aqrar Universitetinin rektoru ilə bağlı müvafiq ölçü götürülməyib».
gundelik-baku.com