Rusiya Müdafiə Nazirliyinin son məlumatlarına görə, 10 Noyabr atəşkəs razılaşmasından sonra Rusiya sülhməramlıları Azərbaycan Respublikasının keçmişdə Dağlıq Qarabağ adlanan ərazisinə artıq 40 mindən çox erməninin qayıdışını təmin edib. Görəsən, bu rəqəm nə dərəcədə doğrudur. Əgər Qarabağa qaytarılan ermənilərin sayı bilərəkdən şişirdilirsə, burada məqsəd nədir?..

Teref.az xəbər verir ki, sabiq Xarici İşlər naziri Tofiq Zülfüqarov mövzuyla bağlı Moderator.az-a açıqlamasında bunları söyləyib.

“Hesab edirəm ki, bu rəqəm həddindən artıq şişirdilir. Ümumiyyətlə, Qarabağda 44 günlük savaşdan əvvəl, yəni işğal illərində 40 min erməninin yaşaması da sual altındadır. Düzdür, orada bir sıra sosial, təminat problemləri var. Müharibədən sonra oradakı ermənilər müəyyən təbliğat nəticəsində panika içərisindədir...

Bu məsələdə bir siyasi məntiq əsas götürülməlidir; Şuşanın hərbi yolla azad edilməsindən sonra Azərbaycan qarşısında iki seçim var idi. Ya Xankəndini də döyüşlə azad etməliydi, ya da dayanmalıydı... Birinci halda yenə də əlavə şəhidlərimiz olacaqdı. Digər tərəfdən, biz də ermənilərin Azərbaycan torpaqlarının işğalı zamanı etdiyi davranışları, məsələn, “harada erməni əsgəri varsa, orada başqa millət, bu halda azərbaycanlı olmamalıdır” prinsipini təkrar etməliydik. Ancaq biz bunu tətbiq etmədik və əslində doğru yol seçdik. Biz dedik ki, əgər Xankəndində, Əsgəranda, Ağdərədə və s. qalan ermənilər Azərbaycan əsgərindən belə qorxurlarsa, onların təhlükəsizliyini müvəqqəti olaraq Rusiya sülhməramlıları təmin etsin. Bu şərtlə ki, orada silahlı erməni birləşmələri qalmasın... Və biz də addımbaaddım suverenliyimizi bərpa edək. Suverenliyi bərpa etmək isə yalnız hansısa binanın üzərinə üçrəngli dövlət bayrağımızı asmaqla bitmir. Manatın dövriyyəsidir, iqtisadi əlaqələrdir və s. Onlarla sahə sadalamaq olar. Bu baxımdan biz anlamalıyıq ki, bu proses xeyli vaxt aparacaq. Və təbii ki, burada çətinliklər də, təxribatlar da ola bilər. Bu siyasəti qəbul etməyənlər də olar. Bir vacib məsələ də Qarabağda yaşayan ermənilərin seçim etməsidir. Yəni kim Azərbaycan Konstitusiyasını, qanunlarını, vətəndaşlığını qəbul edirsə, Azərbaycan torpaqlarında yaşayacaq. Bunu qəbul etməyənlərə qarşı isə Cinayət Məcəlləsinin müvafiq maddələrinə uyğun davranılacaq. Başqa yol yoxdur...”- deyə politoloq vurğulayıb.