Tanınmış müğənni Yaqub Zurufçu Azərbaycana gəlib. Müğənni ilə İçərişəhərdə qarşılaşdıq. O, ailəsi – həyat yoldaşı Aynur xanım və oğlu Atilla ilə birgə gəzintiyə çıxdığını dedi. Əvvəlcə müsahibə verməkdən boyun qaçıran sənətçi və xanımınından çətinliklə də olsa, bəzi suallarımıza cavab ala bildik.

– Yaqub bəy, Azərbaycana nə vaxt gəlmisiniz?

– 15 gündür ki, Bakıdayıq, istədim oğluma İçərişəhəri göstərim. Övladım hələ burda olmayıb. Onunçün hər şey maraqlıdır. Amma inciməyin, mən müsahibə vermək istəmirəm. Nə efirlərə çıxıram, nə də saytlara danışıram.


– Biz sadəcə, hal-əhval tutmaq istəyirik. Amerikada yaşayırsınız?

– Orda da yaşayırıq, burda da…

Xanımı:

– Əsasən Azərbaycanda yaşayırıq, amma biznes üçün Amerikaya gedirik.

– Yaqub bəy hansı bizneslə məşğul olur?

– Biznesimiz yoxdur, sadəcə olaraq xarici ölkələrdə verdiyi konsertləri nəzərdə tuturam. Müğənninin biznesi onun verdiyi konsertlərdir.

– Yaqub Zurufçu ilə aranızda yaş fərqi var, nə əcəb özünüzdən bu qədər böyük birini seçdiniz, səbəb nə oldu?

– Mənim 37 yaşım var, amma həyat yoldaşımla aramızdakı yaş fərqini hiss etmirəm. Mən onu sevdiyim üçün seçdim.

– Övladınızın neçə yaşı var?

– Altı yaşı tamam olacaq. Adı da Atilladır.

– Atası kimi səsi varmı, böyüyəndə müğənni olmaq istəmir ki?

– Yox, atası onun müğənni olmasını istəmir.

Yaqub Zurufçu

– Xanımınızı qısqanırsınız?

– Yox.

– Niyə, gözəl qadındır, üstəlik özünüzdən yaşca da bu qədər kiçikdir?

– Yox, o qadını qısqanarlar ki, gözü-başı qaynaya. Mənim seçdiyim qadın kişi qızıdır.

– Aynur xanım, Yaqub bəyin sizə qadağaları varmı?

Aynur xanım

– Qətiyyən.

– Bir məşhurun xanımı olmağın çətinlikləri varmı?

– Yaqub Zurufçunun xanımı olmaq çətindir.

– Ən sərt xüsusiyyəti hansıdır?

– Sərt xüsusiyyəti yoxdur.

– Bir müddət öncə Yaqub Zurufçunun təşəbbüsü ilə Avropada keçiriləcək konsertlərin fars adı altında təqdimatı qalmaqallara səbəb oldu…

– Afişa məsələsi ilə bağlı qalmaqala Yaqub bəy özü də cavab verdi. Sonra da peşman oldu. Deyir gərək cavab verməyəydim. Çünki hər bir insanın öz fikri var…

– Yəqin ki Amerikada lüks, dəbdəbəli həyat yaşayırsınız?

– Yox, dəbdəbədən uzaq həyatımız var.