Pentaqon rəhbəri: ABŞ Çin ilə münaqişədə Yaponiyanı dəstəkləməyə hazırdır
24-01-2021, 10:38
Pentaqonun yeni rəhbəri Lloyd Ostin və Yaponiya müdafiə naziri Nobuo Kisi arasında telefon danışığı olub.
“RİA Novosti”nin verdiyi məlumata görə, L. Ostin yaponiyalı həmkarına ABŞ-ın Çinin iddia etdiyi Senkaku adasını qoruyacağını vəd edib.
Pentaqon rəhbəri qeyd edib ki, ABŞ və Yaponiya arasında təhlükəsizliklə bağlı müqavilənin 5-ci bəndi Senkaku adasının da əhatə edir və Vaşinqton Şərqi Çin dənizində statsu-kvonun dəyişdirilməsinə yönələn istənilən cəhdə qarşıdır.
Qeyd edək ki, Yaponiyanın “Senkaku”, Çinin “Dyaoyuydao” adlandırdıqları ada iki ölkə arasında mübahisə mövzusudur. Yaponiya 1985-ci ildən adanın ona məxsus olduğunu, Çin isə 1783 və 1785-ci ildəki Yaponiya xəritələrində adanın Çin ərazisi kimi göstərildiyini bildirir. İkinci Dünya Müharibəsindən sonra ada ABŞ-ın nəzarətində olub, 1972-ci ilə Yaponiyaya təhvil verilib. Ancaq Çin və Tayvan hesab edirlər ki, Yaponiya adaya qanunsuz nəzarət edir.
Ərazi mübahisəsi 2012-ci ildə Tokionun arxipelaqın beş adasından üçünü yapon sahibindən almasından və bununla onların dövlət statusunu vurğulamasından sonra daha da kəskinləşib...virtualaz