Böyük Britaniya və Kanada 2022-ci ilin fevralında keçiriləcək Pekin Qış Olimpiya Oyunlarını diplomatik boykot elan edən son dövlətlər olub.

BBC xəbər verir ki, Böyük Britaniyanın Baş naziri Boris Conson ötən gün deyib ki, rəsmi Pekin Çində insan haqlarının pozulması iddiasını qəti rədd etdiyi üçün nazirlər bu ölkədə keçirilən beynəlxalq tədbirdə iştirak etməyəcək. Kanada da insan haqları ilə bağlı narahatlıqları əsas gətirərək günün sonunda eyni addımı atıb. Bu addım, həftənin əvvəlində ABŞ və Avstraliyanın oxşar bəyanatlarından sonra atılıb.

Beynəlxalq Olimpiya Komitəsinin (BOK) Prezidenti Tomas Bax bildirib ki, siyasi boykotların sayının artmasına baxmayaraq, BOK idmançıların hələ də iştirak edə biləcəyindən məmnundur: “Hökumət rəsmilərinin iştirakı hər bir hökumət üçün siyasi qərardır, ona görə də BOK-un neytrallığı prinsipi tətbiq olunur”.

Son illər Çin və bəzi Qərb ölkələri arasında bir sıra diplomatik məsələlərə görə gərginlik artıb. ABŞ Sincan əyalətinin qərbində, əsasən müsəlman uyğur azlığına qarşı repressiyalara görə Çini soyqırımda ittiham edib, Çin isə bu iddianı dəfələrlə rədd edib.

Kanada ilə Çin arasındakı münasibətlər 2018-ci ildə Çin texnoloji nəhəngi “Huawei” şirkətinin liderlərindən birinin ABŞ rəsmilərinin tələbi ilə Kanadada həbsindən və daha sonra iki kanadalının Çində saxlanmasından sonra gərginləşib. Hər üçü bu ilin əvvəlində azadlığa buraxılıb. Münasibətlər həmçinin, Çinin Honq-Konqda siyasi azadlıqlara basqıları və hücumda yüksək rütbəli bir hökumət rəsmisini ittiham etdikdən sonra həftələrdir ictimaiyyətə görünməyən çinli tennisçi Penq Şuai ilə bağlı qorxuları ilə də gərginləşib.

Bu arada Avstraliya, Pekinin Avstraliya siyasətinə və ictimaiyyətinə müdaxilə etdiyinə dair iddiaları fonunda Çinə getdikcə daha çox təhlükəsizlik təhdidi kimi baxır. Həmçinin, Çində həbsdə olan iki Avstraliya vətəndaşı ilə bağlı narahatlıqlar da artıb. Çin öz növbəsində ona qarşı bütün ittihamların uydurma olduğunu bildirib.

Pekində gündəlik keçirdiyi brifinqdə Xarici İşlər Nazirliyinin sözçüsü Vanq Venbin Avstraliyanı siyasi mövqedə ittiham edib: “Onların (hökumət məmurlarının) gəlib-gəlməməsi heç kimin vecinə deyil”. Digər ölkələrin, o cümlədən Yaponiyanın da oyunları diplomatik boykot etməyi düşündüyü bildirilir.

Yeni Zelandiya, əsasən koronavirus pandemiyası səbəbindən rəsmiləri Pekinə göndərməyəcəyini təsdiqləyib, eyni zamanda Çindəki insan haqları ilə bağlı narahatlıqları da artıb.