Ukrayna Prezident Ofisi rəhbərinin müşaviri Aleksey Aretoviç hesab edir ki, Ukrayna artıq faktiki olaraq NATO-nun üzvüdür.

Moderator.az "UNİAN"-a istinadla xəbər verir ki, o, bu fikri Mark Feyqinlə canlı yayımda bildirib.

"Daha bir “at gedişi” etdik. Biz "Üç dəniz"(Baltik, Qara və Adriatik dənizləri-S.L.) təşəbbüsünün 13-cü ölkəsi olduq. Bu, pula, nəqliyyata, dənizdə təhlükəsizliyə, infrastruktura çıxışdır. "Üç dəniz"in 12 ölkəsi isə Aİ-nin üzvüdür. Bu, Aİ ölkələrinin demək olar ki, yarısıdır. Bu o deməkdir ki, bizim Aİ ilə inteqrasiyamız hazırda hamının qiymətləndirdiyindən çox irəli gedib. İkincisi, siz başa düşməlisiniz ki, biz faktiki olaraq NATO-nun üzvüyük”, - o bildirib.

Eyni zamanda, Arestoviç qeyd edib ki, “NATO-nun Ukraynanı qəbul etməyə hazır olub-olmadığına şübhə ilə yanaşır”.

Bundan əvvəl Arestoviç bildirib ki, hərbi əməliyyatlar zamanı Ukraynanın NATO-ya qəbul olunma ehtimalı azdır, lakin qələbədən sonra erkən üzvlüklə bağlı müzakirələrin bərpa olunacağı ehtimalı var.