MEDVEDEV HANSI NÜVƏ OBYEKTLƏRİNİ VURA BİLƏCƏKLƏRİNİ AÇIQLADI - Zelenski cavab verdi
10-07-2023, 11:24
Rusiya Federasiyası Təhlükəsizlik Şurasının sədr müavini Dmitri Medvedev bildirib ki, Smolensk AES-ə NATO raketləri ilə hücum cəhdi təsdiqlənərsə, o zaman Rusiya sərt hərəkət etməli olacaq.
Bu barədə o, “Telegram”da yazıb.
“Rusiyanın Cənubi Ukrayna AES-ə, Rovno AES-ə və Xmelnitski AES-ə, eləcə də Şərqi Avropadakı nüvə obyektlərinə eyni vaxtda zərbə endirməsi ssenarisini nəzərdən keçirmək lazımdır”, - Medvedev qeyd edib.
Həmçinin, Rusiya Federasiyası Təhlükəsizlik Şurasının sədr müavini əlavə edib ki, burada utanmalı heç nə yoxdur.
Ukrayna Prezidenti Volodimir Zelenski isə Rusiyanın nüvə silahından istifadə ehtimalını şərh edib.
O, Putinin nüvə silahına əl atacağına inanmadığını deyib.
Dövlət başçısı əlavə edib ki, Ukrayna kəşfiyyatı Rusiyanın Zaporojye atom elektrik stansiyasını minalaya biləcəyini düşünür.
Qeyd edək ki, ötən ilin sentyabrında da Zelenski Rusiyanın nüvə silahından istifadə ehtimalına inanmadığını bildirmişdi.
