Rusiyanın Ukraynaya qarşı işğalçılıq müharibəsi təkcə döyüş meydanında deyil, informasiya savaşında da bütün əndazələri aşır.

"AzPolitika.info" xəbər verir ki, Rusiya Təhlükəsizlik Şurasının katibi Nikolay Patruşev Ukrayna ordusuyla bağlı maraqlı iddia ilə çıxış edib.

"RİA-Novosti" yazır ki, Patruşev yaralı Ukrayna döyüşçülərindən "biomaterial" kimi istifadə olunduğunu bildirib: "Ukraynalılardan təkcə "top əti" kimi istifadə etmirlər, ukraynalı yaralı döyüşçülərdən həm də biomaterial kimi istifadə edərək, gizli şəkildə transplantasiya üçün onların daxili orqanlarını çıxarırlar".

Bu zaman Patruşev Ukraynada qəbul edilən “Transplantasiya haqqında” Qanunu xatırladıb və iddia edib ki, bu qanun məhz ukraynalı döyüşçülərinin daxili orqanlarının çıxarılaraq satılması üçün nəzərdə tutulub. Patruşev bütün bu "baş verənlərdə" Kiyev rejimini və şəxsən Prezident Volodimir Zelenskini günahlandırmağı unutmayıb.

Qeyd edək ki, bundan öncə də Patruşev qeyri-adekvat ittihamları ilə seçilib. Məsələn, o, iddia edib ki, nəinki Qərbdə, heç Rusiyada da çoxlarının tanımadığı Darya Duqina və Vladlen Tatarski kimi Kreml təbliğatçılarını ABŞ qətlə yetirib.