Bugünlərdə yazmışdım ki, ermənilər sanki iynə üstündə oturublar. “Azadlıq” radiosunun erməni bölümünün ingilisdilli xidməti elə bu məsələdən bəhs edən "In Southern Armenia, Global Powers Move In Amid Fears Of A New Azerbaijani Offensive " (Cənubi Ermənistanda Qlobal Qüvvələr Azərbaycanın yeni hücum təhlükəsinə nəzərən hərəkət edirlər) adlı məqalə ilə çıxış edib.
Yazıda deyilir ki, Azərbaycanla Ermənistan arasında mövcud olan qeyri-müəyyənlik Sünik şəhərinin bir çox sakinini çıxılmaz vəziyyətdə qoyub.
Sünikdə xəbərləri işıqlandıran “Zəngəzur TV” (heç vaxt ağlıma gəlməzdi ki, Ermənistanda Zəngəzur adında TV olsun) kanalının jurnalisti Tiqranuhi Badalyan deyir: "Hər səhər yuxudan durub düşünürəm ki, nə yaxşı bu gün müharibə başlamayıb, çünki hər gün müharibənin başlanma gözləntisi var".
"Azərbaycan prezidentinə baxmağı heç xoşlamıram, amma hər gün yatmazdan əvvəl onun çıxışını əks etdirən videolara baxıram, çıxışı təhlil edərək sabah müharibə olub-olmayacağını təxmin etməyə çalışıram. Hər dəfə evə nəsə almaq istəyəndə, evi təmir etmək fikrinə düşəndə, ya da mebel almaq ürəyimdən keçəndə düşünürəm ki, sabah müharibə başlasa, hər şeyi itirəcəm”.
Elbeyi Hesenli
Teref.az