Rusiya cümə günü Ukraynanı BMT-nin Atom Nəzarəti Təşkilatı rəhbərinin əraziyə baş çəkməsinə bir neçə gün qalmış keçən gecə Kursk Atom Elektrik Stansiyasına hücum cəhdində ittiham edib. O bunu "nüvə terroru" adlandırıb.

Ukrayna Müdafiə Nazirliyi ittihamla bağlı şərh verməyib. Bu, son iki gündə ikinci dəfədir ki, Moskva belə bir iddia irəli sürür.

Atom elektrik stansiyası Rusiyanın qərbində, Ukrayna qüvvələrinin avqustun 6-da gözlənilməz müdaxiləsindən sonra şiddətli döyüşlərin getdiyi Kursk bölgəsində yerləşir.

Rusiya Müdafiə Nazirliyi açıqlamasında Hava Hücumundan Müdafiə Qüvvələrinin keçən gecə Kursk vilayətində Ukraynanın 3 pilotsuz təyyarəsini vurduğunu və Ukraynanın Rusiya obyektlərinə qarşı "terror hücumları" həyata keçirmək cəhdlərinin qarşısını aldığını bildirib.

Rusiyanın TASS dövlət xəbər agentliyi adı açıqlanmayan mənbəyə istinadən bildirib ki, pilotsuz təyyarə Kursk elektrik stansiyasında işlənmiş nüvə yanacağının saxlandığı anbar yaxınlığında vurulub. Reuters xəbər agentliyi iddia edilən hadisənin təfərrüatlarını müstəqil olaraq təsdiq edə bilməyib.

TASS Rusiya Xarici İşlər Nazirliyinin sözçüsü Mariya Zaxarovaya istinadən xəbər verib ki, bu, "nüvə terroru aktı"dır və BMT-nin nəzarət orqanı olan Beynəlxalq Atom Enerjisi Agentliyinin dərhal münasibət bildirməsini tələb edir.

BAEA rəhbəri Rafael Qrossi elektrik stansiyasına gələn həftə baş çəkməlidir. O, nüvə qəzasının qarşısını almaq üçün maksimum təmkinli olmağa çağırıb.

Rusiya prezidenti Vladimir Putin cümə axşamı Ukraynanı obyektə hücum cəhdində ittiham edib və Moskvanın BAEA-nı məlumatlandırdığını bildirib. O, Ukraynanın hücumu ilə bağlı heç bir təfərrüat və ya sübut təqdim etməyib.

Ukraynanın minlərlə əsgərinin avqustun 6-da Rusiya sərhədindən keçərək, Kurska müdaxiləsi İkinci Dünya Müharibəsindən bəri xarici dövlətin Rusiya ərazisinə etdiyi ən böyük müdaxilədir və bu, Moskva üçün gözlənilməz olub.

Kyiv bildirib ki, 2022-ci ildə Ukraynaya on minlərlə əsgər göndərən Rusiyanın Ukraynadakı hədəfləri vurmaq üçün istifadə etdiyi bu ərazidən bufer zonasını ayırıb.