Kobaxidze deyib ki, deputat mandatlarının ləğvi Milli Hərəkat partiyasına qoyulan qadağanın məntiqi davamı olardı, bunu konstitusiya məhkəməsi edə bilər.
Gürcüstanın eks-prezidenti Mixail Saakaşvilinin "Vahid Milli Hərəkat" partiyası konstitusiyaya zidd elan ediləcək və bu siyasi qüvvədən olan parlamentarilər deputat mandatlarından məhrum ediləcəklər. Bu barədə Gürcüstanın baş naziri İrakli Kobaxidze jurnalistlərə bildirib.
"İnanıram ki, iki subyekt parlamentə daxil olacaq. Bu, "Gürcü arzusu" və müxalifət birliklərindən biri olacaq. Qalanı siyasi proseslərin necə gedəcəyini vətəndaşlar həll edəcək. Baryeri aşsalar da, hakimiyyət dövründə, sonra 12 il müxalifətdə olmaqla, etdiklərinə görə məsuliyyətdən yaxa qurtara bilməyəcəklər. Deputat mandatlarının ləğvi "Vahid Milli Hərəkat" partiyasına qoyulan qadağanın məntiqi davamı olardı, bunu konstitusiya məhkəməsi edə bilər" - Kobaxidze jurnalistlərə bildirib.
Oktyabrın 26-da Gürcüstanda parlament seçkiləri keçiriləcək. Kobaxidze daha əvvəl demişdi ki, "Gürcü arzusu" çoxluq əldə edərsə, Saakaşvilinin partiyasını konstitusiyaya zidd elan edəcək.