Mühafizəkar liderlər, o cümlədən ABŞ Prezidenti Donald Tramp, Argentina, Britaniya, Polşa və İtaliyadan olan siyasətçilər cümə axşamından başlayaraq Vaşinqton yaxınlığında keçiriləcək üç günlük mühafizəkarların toplantısında çıxış edəcəklər.

ABŞ vitse-prezidenti JD Vans Mühafizəkar Siyasi Fəaliyyət Konfransına (CPAC) rəhbərlik edəcək. Cümə axşamı planlaşdırılan digər sessiyalara kriptovalyutalar və Yaxın Şərqdə sülh mövzularında müzakirələr, həmçinin Qəzzada girov saxlanılan şəxslərin qohumlarının iştirak etdiyi panel daxildir.

CPAC konfransı Trampın mühafizəkar siyasətdə önəmli fiqura çevrilməsinə kömək edib və o, prezidentliyi dövründə hər il bu tədbirdə çıxış edib.

Keçən ilki çıxışında Tramp noyabrda prezident seçkilərində qələbə qazandığı təqdirdə "hökumətimizi ələ keçirən yalançılar, fırıldaqçılar, senzura tərəfdarları və saxtakarlar üçün mühakimə günü" olacağını vəd etmişdi.

ABŞ Nümayəndələr Palatasının sədri Mayk Conson da cümə axşamı çıxış edəcək siyasətçilər arasındadır. Həmçinin tədbirdə Böyük Britaniyanın keçmiş baş naziri Liz Truss və Macarıstanın baş naziri Viktor Orbanın siyasi direktoru Balaj Orban çıxış edəcəklər.

İspaniyanın sağçı Vox partiyasının rəhbəri Santyaqo Abaskal, britaniyalı siyasətçi Naycel Farac və Polşanın keçmiş baş naziri Mateuş Moravetski də tədbirə qatılacaq.

Konfransın növbəti günlərində Slovakiyanın baş naziri Robert Fiko, Argentinanın prezidenti Xavyer Miley və İtaliyanın baş naziri Corcia Meloni də çıxış edəcəklər.