“Vətənimizin, xalqımızın taleyinin bu vacib və həlledici anlarında bizim kənarda qalmağımız qeyri-mümkündür…”

Moderator.az redaksiyasına özlərini Yeni Azərbaycan Partiyasının yaradıcıları kimi təqdim edən bir qrup klassik YAP fəalının Prezident, Ali Baş Komandan, Yeni Azərbaycan Partiyasının sədri

cənab İlham Əliyevə Milli Ordumuzun torpaqlarımızın azadlığı uğrunda apardığı uğurlu hərbi əməliyyatlarla bağlı müraciəti daxil olub.

Müraciəti olduğu kimi nəzərinizə çatdırırıq:

“Azərbaycan Respublikasının Prezidenti

Ali Baş Komandan

Yeni Azərbaycan Partiyasının sədri

Çox hörmətli İlham ƏLİYEVƏ

M Ü R A C İ Ə T

Vətənimiz və xalqımız ağır müharibə ilə üzləşib. Ordumuz qələbələrlə irəliləyir, işğalçılar torpaqlarımızdan süpürülüb atılır. Məğlubiyyətinə dözə bilməyən amansız düşmən şəhər, rayon və kəndlərimizi bombalayıb dağıdır. Dinc əhali içərisində onlarla həlak olan, yaralanan uşaq, qadın və qocalar vardır. Erməni faşistləri Bakı ətrafı əraziləri də raket atəşinə tuturlar. Tökülən qanlardan gözü doymayan düşmən müharibə meydanında uduzduqca azğınlaşır. Vətən taleyinin ağır günlərində biz tamaşaçı mövqeyində dayana bilməzdik. 1990-cı illərdə də vətənimizin ağır məqamlarında təzyiq və təhlükələrdən qorxmadan liderimiz Heydər Əliyevin ətrafında birləşərək mübarizlik göstərib məqsədimizə nail olduq. Hazırkı müharibə vəziyyəti də bizi ciddi narahat edir.

Hörmətli Prezident! Cənab Ali Baş Komandan!

Vətənimizin, xalqımızın taleyinin bu vacib və həlledici anlarında bizim kənarda qalmağımız qeyri-mümkündür. Ölkəmizdə şiddətli müharibə gedən zaman imkanımız müqabilində öz xidmətimizi göstərmək istəyindəyik. Təcrübəmiz, biliyimiz, vətənpərvərlik əzmimizi töhfə verməyə hazırıq.

Xahiş edirik vətənə borcumuzu nəzərə alıb müvafiq göstərişinizi verəsiniz.

Yeni Azərbaycan Partiyasının yaradıcılarından:

Maksim MusayevAsya Manafova

Arif Rəhimzadə Əli Əlirzayev

Rizvan Vahabovİsgəndər Quliyev

Xaqani Bəşirov Dünyamalı Məmmədov

Fərrux HaqverdiyevŞirvan Əbilov

Cahangir Hüseynov Aslan Abbasov

Yaşar Rzayev Misirxan Vəliyev

Novruz Quliyev

15 oktyabr 2020-ci il.”