Azərbaycan Ordusu 44 günlük müharibə ilə torpaqlarını işğaldan azad etsə də, Gənclər və İdman Nazirliyi hələ Aprel döyüşlərinə həsr edilən tədbirlərlə pul silməkdə davam edir.
Reportyor.info xəbər verir ki, nazirlik Aprel döyüşlərinə həsr edilmiş qısametrajlı bədii filmin təqdimat mərasiminin keçirilməsi üçün tender elan edib və bu günlərdə müsabiqənin qalibi “TECH” MMC olub.
Bu məqsədlə şirkətin hesabına 154 600 manat köçürülüb. Sual doğurur ki, 5 il qabaq baş vermiş döyüşlərin barəsində qısametrajlı bədii film çəkilməsi indi niyə yada düşüb və təqdimatı niyə indi təşkil olunur? Ən azı bunu hadisələrin bitməsindən az müddət sonra həyata keçirmək olardı.
Üstəlik, Azərbaycan Aprel döyüşlərindən başlayaraq, 2020-ci ildə 44 günlük Vətən müharibəsi ilə daha böyük tarix yazıb və Qarabağı, Şuşanı düşməndən azad edib.
İndi bu zəfər haqda film çəkmək və təqdimatını keçirmək daha məntiqli olardı. Görünür ki, iş çoxdan təhvil verilib, lakin təqdimatını keçirməyiblər.
Nazirlik isə tender elan etməklə 154 min 600 manatı həzm-rabedən keçirməyi planlaşdırır. Bu tender ciddi maxinasiya şübhəsi yaradır.