Azərbaycan Ordusunun hərbi qulluqçusu Süleyman Sultanovun övladı ağır xəstəlikdən əziyyət çəkir.
Bu barədə Bakupost.az –a müraciət edən 15 yaşlı Səkinənin anası Ulduz Süleymanova bildirir ki, həyat yoldaşı 1998-ci ildən hərbi həkim vəzifəsində xidmət edir:
“Ömrünün ən gözəl 25 ilini ön cəbhədə Vətənimizə həsr edib. Həm xidmət etdiyi dövr ərzində, həm də 44 günlük Vətən Müharibəsi zamanı onlarla zabit və əsgərimizin həyatını xilas edib. Hazırda Laçın rayonunda xidmət edir. Aylarla Sumqayıtda yerləşən evimizə gələ bilmir. Buna görə də uşağın müalicəsi ilə məşğul ola bilmirik”.
Övladının uzun müddətdir ağır beyin xəstəliyindən əziyyət çəkdiyini bildirən U. Sultanova deyir ki, dövlət qurumlarına dəfələrlə müraciət etsə də, övladının müalicəsi üçün heç bir köməklik göstərilmir.
O, həyat yoldaşının hərbi qulluqçu olduğunu, övladlarının xəstəliyi səbəbindən sosial vəziyyətlərinin pis olmasını və növbəti müalicələr üçün pul vəsaitlərinin olmadığını nəzərə alaraq son ümid yeri olaraq Səkinənin müalicəsinə xüsusi diqqətin ayrılması üçün Prezident İlham Əliyevdən və Birinci xanım Mehriban Əliyevadan xahiş edir.