"Mənzil İnşaatı Dövlət Agentliyi" MMC (MİDA) növbəti dəfə "R.İ.S.K. Elmi İstehsalat Şirkəti" QSC ilə müqavilə imzalayıb.

TEREF Teleqraf-a istinadən xəbər verir ki, agentliyin elan etdiyi tenderin qalibi olan sözügüdən şirkət 1.569.400 manata güzəştli mənzil sisteminin fasiləsiz və dayanıqlı işinin təmin edilməsi üçün 24/7 texniki dəstək və süni intellekt əsaslı monitorinq həllinin tətbiqi xidmətini göstərəcək.

Müqavilənin müddəti 2026-cı ilin yanvar ayının 8-nə qədərdir.

Qeyd edək ki, "R.İ.S.K. Elmi İstehsalat Şirkəti" QSC ilə bundan əvvəl 2020-ci ildə ümumi dəyəri 917 min manat, 2021-ci ildə 395 min 772 manat, 2023-cü ildə 964 min 296 manat, təşkil edən müqavilə imzalanıb. Ötən il MİDA və şirkət arasında 3 tender sazişi imzalanıb. Bu müqavilələrin isə toplam dəyəri 2 milyon 438 min 092 manat olub.

2017-ci ildən “R.İ.S.K. Elmi İstehsalat Şirkəti” MİDA-nın say baxımından ən çox müqavilə bağladığı qurumdur.

Yeri gəlmişkən, “Güzəştli mənzil” sistemi "R.İ.S.K. Elmi İstehsalat Şirkəti" tərəfindən qurulub. 2017-ci ildə proqram təminatının yazılması və sistemin işlək hala gətirilməsi üçün agentlik "R.İ.S.K. Elmi İstehsalat Şirkəti"nə 259,7 min manat ödəyib.