Ədalət anlayışı hər bir cəmiyyətin dayaq sütunudur. Lakin bu sütun əyiləndə, cəmiyyətin inamı da sarsılır. Azərbaycan məhkəmə sistemində son illər müşahidə edilən qəribə və ziddiyyətli qərarlar, sadə vətəndaşların “məhkəmə ədalət axtarmaq yeridir” düşüncəsinə ciddi zərbə vurur.

Məhkəmələr kimin tərəfindədir?
"DogruXeber.az" bildirir ki, bu sual ritorik deyil. İctimai rəydə belə bir təəssürat yaranıb ki, iqtisadi gücü olanlar, yaxud yüksək vəzifəli şəxslərlə bağlılığı olanlar məhkəmə zallarından rahat çıxır, amma sadə vətəndaş aylarla, illərlə sürünür. Bəzən də, ədalət deyil, pullu təmsilçilik qalib gəlir.

Ən narahatedici məqam isə budur: eyni xarakterli işlər üzrə fərqli qərarlar verilir. Bir rayon məhkəməsində eyni hal şərti cəza ilə nəticələnirsə, başqa bir rayonda az qala ağır cəza çıxarılır. Bəs bərabərlik prinsipi harada qaldı?

İctimai qınaq, sosial şəbəkələrdə yayılan şikayətlər, insan hüquqlarına dair beynəlxalq hesabatlar sübut edir ki, Azərbaycanda məhkəmə sisteminə inam sürətlə azalır. Əgər bir ölkədə insanlar “hüquq yolu ilə həll etmək” əvəzinə vasitəçilər axtarırsa, bu artıq dövlətçiliyin özü üçün həyəcan siqnalıdır.

Ədalət seçici olmamalıdır. Ədalət zənginə də, kasıba da eyni məsafədə dayanmalıdır. Yoxsa sabah hər kəs öz “ədalətini” küçədə axtarmağa başlayacaq.