29-cu "EnergaCAMERIMAGE" Beynəlxalq Film Festivalı bu ilin 13-20 noyabr tarixlərində Polşa Respublikasının Torun şəhərində keçiriləcək.
Azərbaycan Respublikası Mədəniyyət Nazirliyinin dəstəyi ilə "Bakı Media Mərkəzi" və "Salnaməfilm" Studiyası tərəfindən istehsal olunmuş "Sonuncu" sənədli filmi 29-cu "EnergaCAMERIMAGE" Beynəlxalq Film Festivalının qısametrajlı sənədli filmlər üzrə müsabiqə bölməsində yarışacaq.
"Azərbaycanfilm" kinostudiyasından Sputnik Azərbaycan-a verilən məlumata görə, festival bu ilin 13-20 noyabr tarixlərində Polşa Respublikasının Torun şəhərində keçiriləcək.
Məlumata görə, festivalın "Qısametrajlı Sənədli Filmlər Müsabiqəsi"nin nüfuzu ondadır ki, “EnergaCAMERIMAGE” Sənədli Qısametrajlılar kateqoriyasında Kino Sənəti və Elmləri Akademiyası tərəfindən ACADEMY AWARD® kvalifikasiyası ilə qeydə alınıb. Bu o deməkdir ki, “EnergaCAMERIMAGE”-də müvafiq bölmədə Qızıl Qurbağa mükafatçıları, Akademiya qaydalarına uyğun olması şərti ilə, İllik Akademiya Mükafatlarının Sənədli Qısametrajlı Filmlər kateqoriyasında nəzərdən keçiriləcək.