Türkiyə xarici işlər naziri Mövlud Çavuşoğlu “Niyə Türkiyə mübarizəni Suriyaya keçirdi” adlı məqalə yazıb.

APA-nın Türkiyə bürosu xəbər verir ki, nazir məqaləsində ölkəsinin “Barış bulağı” hərbi əməliyyatına başlamasını milli təhlükəsizliklə və didərgin suriyalıların evlərinə qayıtmasına dəstək olmaqla izah edib.

Nazir yazıb ki, Türkiyənin şimal-şərqi Suriyadakı hərbi əməliyyatı Amerika mətbuatında kürdlərə qarşı hücum, İŞİD-in qalıqlarıyla mübarizəni zəiflətmək və Amerikanın müttəfiqləri nəzdindəki təhlükəsizliyə zərər vermək kimi yozulması çox məyusedicidir: “Yanlış anlayışları ortadan qaldırmaq məcburiyyətindəyəm, çünki Türkiyənin ABŞ-la 67 illik NATO müttəfiqliyi müvəqqəti, taktiki və ya müzakirəyə açıq deyil”.