Türkiyədə yayımlanan “Akıncı” serialının 16-cı bölümündə Azərbaycan xəritəsi ilə bağlı yanlışlıq düzəldilib.

Teref.az Musavat.com-a istinadən xəbər verir ki, bu barədə NTC – Media açıqlama yayıb. Açıqlamada qeyd edilir:

“Akıncı serialının 16-cı bölümündə dünya ölkələrinin sərhədlərini öz maraqları naminə yenidən müəyyənləşdirməyə cəhd göstərən “Haritacılar” adlı qanunsuz bir təşkilata üzv olan serialın mənfi obrazı tərəfindən Türkiyə və onun qonşu ölkələrini göstərən qondarma xəritə göstərilmişdir”.

Media qurumdan verilən məlumatda əlavə olaraq bildirilir ki, tamamilə qondarma bir təşkilat olan “Haritacılar” tərəfindən kadrlara salınan o xəritə serialın bütün digər elementləri kimi bir xəyal məhsuludur: “O epizodda olan xəritə və xəritədəki sərhədlər də həqiqəti əks etdirmir. Ssenariyə əsasən, bir qondarma təşkilatın niyyətini göstərmək üçün qurulsa da, dost və qardaş Azərbaycan xalqının həssaslığı nəzərə alınaraq bu xəritə dəyişdirilmişdir”.

Xatırladaq ki, “Akıncı”da serialının 16-cı bölümünün 41:27-ci saniyələrində kadrda xəritədə Azərbaycan ərazisi Ermənistan kimi təqdim edilmişdi. Bu yanlışlıq həm qardaş Türkiyədə, həm də ölkəmizdə sərt reaksiyalara səbəb olmuşdu.

“Akıncı” 2021-ci ilin yanvarın 1-dən Türkiyənin “atv” telekanalında yayımlanır. Baş rollarda Şükrü Özyıldız, Büşra Dəvəli, Yıldıray Şahinlər və Tolqa Təkin yer alır. Hər bölüm 120 dəqiqə sürür. Çəkilişlər İstanbulda həyata keçirilir.

“Akıncı”nın ilk 12 bölümünün rejissoru Vəli Çəlik olub. Sonradan o, yaradıcı heyətdən ayrılıb. Onunla birlikdə ssenari müəllifi Hakan Kandal da gedib. Son bölümləri Ləvənt Türkan və Gökhan Erkut çəkib. Hazırda serialın ssenari müəllifi Altuğ Küçükdür.